ჩვენთვის განსაკუთრებით მნიშვნელოვანია ის, რომ მიიღეს რეზოლუცია, სადაც ხაზი გაესვა ჩვენთვის კანდიდატის სტატუსის მნიშვნელობას და არის პირდაპირი მოწოდება ევროპული სტრუქტურების მიმართ, რომ საქართველოს მიენიჭოს კანდიდატის სტატუსი, - ამის შესახებ ,,ქართული ოცნების’’ თავმჯდომარე ირაკლი კობახიძემ განაცხადა.
როგორც ირაკლი კობახიძემ აღნიშნა, ამ კუთხით, ძალიან მნიშვნელოვანია, ევროპული პოლიტიკური ოჯახის მხარდაჭერა.
მისივე თქმით, დიდი მოლოდინია, რომ ყრილობაზე ფედერალური კანცლერის გზავნილები საქართველოს ევროპულ ოჯახში გაწევრიანების მხარდამჭერი იქნება.
"ჩვენ ინტერესით ველოდებით, ფედერალური კანცლერის მიმართვას ყრილობის მიმართ. რა თქმა უნდა, ბევრი საინტერესო საკითხი იქნება წინ წამოწეული, რაც მათ შორის, დაკავშირებული იქნება საქართველოს ევროპულ სტრუქტურებში ინტეგრაციასთან პირდაპირი, თუ არა პირდაპირი ფორმით. შესაბამისად, ჩვენთვის საინტერესოა რა გზავნილები გაჟღერდება და ძალიან დიდი იმედი გვაქვს, რომ ეს გზავნილები ჩვენი ევროპული გზის მხარდამჭერი იქნება’’, - განაცხადა ირაკლი კობახიძემ.
ბერლინში ევროპელი სოციალ-დემოკრატების პარტიის (PES) საერთაშორისო კონგრესი მიმდინარეობს, რომელშიც მონაწილეობს „ქართული ოცნების“ დელეგაცია ირაკლი კობახიძის ხელმძღვანელობით.
IPN.ge
