ცენტრ „ემპათიას“ ხელმძღვანელის, მარიამ ჯიშკარიანის განცხადებით, საქართველოს მესამე პრეზიდენტის, მიხეილ სააკაშვილის გუშინდელ სასამართლო პროცესში მონაწილეობამ შექმნა რისკი მისი ჯანმრთელობის მდგომარეობის უკიდურესი დამძიმებისთვის, რაც შეიძლება ადამიანის უფლებების დარღვევად შეფასდეს.
როგორც ჯიშკარიანმა ჟურნალისტებს განუცხადა, „შესაძლებელია განვითარდეს როგორც ინსულტი, ასევე შეიძლება განვითარდეს გულ-სისხლძარღვთა სისტემის მწვავე უკმარისობა ინფარქტის სახით“.
„ჩვენ გავეცით რეკომენდაცია, რომ ნებისმიერი დისტრესი, რომელიც განმეორდა გორის სამხედრო ჰოსპიტალში და მას მოჰყვა შემდგომ კრიზისული მდგომარეობა, ეს გამოიწვევს სიცოცხლისათვის რისკს, ვინაიდან ამ დროს ჰიპერტონიული კრიზის ფონზე ვითარდება კრიზისული მდგომარეობა, რაც რისკის შემქმნელია გულ-სისხლძარღვთა სისტემის მწვავე უკმარისობისთვის. შესაძლებელია განვითარდეს როგორც ინსულტი, ასევე შეიძლება განვითარდეს გულ-სისხლძარღვთა სისტემის მწვავე უკმარისობა ინფარქტის სახით. ჩვენ გავეცით რეკომენდაცია სასამართლოსთვის, რომ ექსპერტიზის დასრულებამდე მიზანშეწონილად არ მიგვაჩნია ჯანმრთელობის მდგომარეობის გათვალისწინებით სამართლებრივ პროცედურებში მისი მონაწილეობა, თუმცა ეს არ იყო გათვალისწინებული და გუშინდელი აქტი ჩვენ შეგვიძლია შევაფასოთ, როგორც ადამიანის უფლებების დარღვევა, ვინაიდან ამან შექმნა რისკი მისი ჯანმრთელობის მდგომარეობის უკიდურესი დამძიმებისთვის.
დღეს ვგეგმავთ ერთობლივ ვიზიტს, გარკვეული პროცედურებია ჩასატარებელი ჯანმრთელობის მდგომარეობის შესწავლის მიზნით. ასევე ვიმედოვნებთ, რომ ჯანდაცვის სამინისტროს რეგულირების სააგენტო იმოქმედებს კანონის შესაბამისად გასცემს პროფესორი კობის დროებით ლიცენზიას და მასაც ექნება შესაძლებლობა შეაფასოს მიხეილ სააკაშვილის ჯანმრთელობის მდგომარეობა. ვინაიდან საქმე გვაქვს რთულ შემთხვევასთან, რომელიც გამოირჩევა მულტიპროფილური დიაგნოზებით, ნებისმიერი ექსპერტის მოსაზრება მნიშვნელოვანია“, - განაცხადა ჯიშკარიანმა.
(ipn)
