ჩვენ ვართ გამიჯნული, ისინი თავად გაგვემიჯნენ, ამით ყველაფერია ნათქვამი, მათ შორის პოზიციებთან დაკავშირებით გვაქვს განსხვავებები და ამიტომაც ვართ გამიჯნულები , - ამის შესახებ საქართველოს პრემიერ-მინისტრმა, ირაკლი ღარიბაშვილმა ჟურნალისტის მიერ „ქართული ოცნებიდან“ გასულ დეპუტატებზე დასმული კითხვის პასუხად განაცხადა.
პრემიერის თქმით, ყველა ადამიანს აქვს სრული უფლება, რომ მიიღოს ნებისმიერი გადაწყვეტილება, რაც თავად მიაჩნია სწორად.
„ჩვენ ასე გვესმის დემოკრატია. ჩვენ ვართ დემოკრატიული საზოგადოება, ჩვენ მაქსიმალურად ხელი უნდა შევუწყოთ პლურალიზმს, სხვადასხვა იდეების, იდეოლოგიების განვითრებას და საბოლოო ჯამში, ხალხმა უნდა გადაწყვიტოს რომელი იდეოლოგიაა მისაღები. მე ადრეც მითქვამს და კიდევ გავიმეორებ - ჩვენ გვქონდა გუნდის შიგნით საუბარი ამ საკითხებზე და ჩვენ მათ ვუთხარით, რომ ჩვენ არ ვეთანხმებით მათ პოზიციებს. ჩვენ ეს ღიად დავაფიქსირეთ. ჩვენ ვუთხარით, რომ მიუღებელი იყო მათი ასეთი ფორმით გამოხატულება ამ პოზიციების“, - აღნიშნა ღარიბაშვილმა.
როგორც მთავრობის მეთაურმა განაცხადა, საქართველო პატარა ქვეყანაა, სადაც ძალიან ბევრი გამოწვევებია, ტერიტორიების ნაწილი ოკუპირებულია „გვჭირდება მეტი ძლიერი პარტნიორი და მოკავშირე“.
„ჩვენ გვჭირდება ყველასთან ძალიან კარგი, ძლიერი უთიერთობები, მით უმეტეს ჩვენს მთავარ პარტნიორებთან - ამერიკის შეერთებულ შტატებთან, ევროკავშირის წარმომადგენლებთან“ , - აღნიშნა ღარიბაშვილმა.
IPN.ge
