28 სექტემბერს სომხეთის საგარეო საქმეთა სამინისტროს მიერ აზერბაიჯანული მხარის ცეცხლის შეწყვეტის რეჟიმის დარღვევის შესახებ გაკეთებული უსაფუძვლო განცხადება, ისევე ამ ქვეყნის პრემიერ-მინისტრის სოციალურ ქსელში აზერბაიჯანის წინააღმდეგ ცრუ ბრალდებები, აშკარად აჩვენებს, რომ სომხეთი მიზნად ისახავს რეგიონში სიტუაციის გამწვავებას.
InterPress.ge-ს ინფორმაციით, ასე უპასუხა აზერბაიჯანის საგარეო საქმეთა სამინისტრომ სომხეთის საგარეო საქმეთა სამინისტროს 28 სექტემბრის განცხადებაზე.
აღინიშნა, რომ როგორც ადრე აზერბაიჯანის რესპუბლიკის თავდაცვის სამინისტროდან აცნობეს, სომხეთის შეიარაღებული ძალების ქვედანაყოფებმა 28 სექტემბერს დაახლოებით 18:00 საათზე ცეცხლი გაუხსნეს აზერბაიჯანის არმიის ქვედანაყოფებს კალბაჯარის რაიონის მიმართულებით. რის შედეგადაც მძიმედ დაშავდა აზერბაიჯანის არმიის სამხედრო მოსამსახურე:
„ამგვარად, სომხური მხარის მიერ ცეცხლის შეწყვეტის რეჟიმის დარღვევით განხორციელებული პროვოკაციის საპასუხოდ, აზერბაიჯანის არმიამ მიიღო ადეკვატური ზომები.
უდავოა, რომ სომხური მხარის პროვოკაციები, რომლებმაც უკვე შეიძინეს „ტრადიციის“ ხასიათი, განზრახ ხდება მორიგი მაღალი დონის შეხვედრის წინა დღეს. შეგახსენებთ, რომ სომხეთმა დაარღვია ცეცხლის შეწყვეტის შეთანხმება მიმდინარე წლის 13 სექტემბერს, 9:00 საათზე, კოლექტიური უსაფრთხოების ხელშეკრულების ორგანიზაციის სამიტის წინა დღეს და 36 საათის განმავლობაში აგრძელებდა პროვოკაციებს დაძაბულობის მიზანმიმართული გაზრდით.
ახლაც, როცა ორ სახელმწიფოს შორის კონტაქტები კვლავ მიმდინარეობს, დაგეგმილია მორიგი შეხვედრები და რეგიონში საერთაშორისო შუამავლების ვიზიტის წინ, სომხეთი იგივე თამაშს თამაშობს და ხალხი სუსტი პოლიტიკის მსხვერპლს ხდის.
გასაგებია, რომ ეს არის სომხეთის მორიგი საბაბი მოლაპარაკებების პროცესის ჩაშლის მიზნით.
სომხეთის ხელმძღვანელობამ არ უნდა გაამძაფროს სიტუაცია რეგიონში, არ უნდა გამოთქვას დათქმები მოლაპარაკების პროცესში, უნდა შეწყვიტოს საერთაშორისო თანამეგობრობის დადანაშაულების პრაქტიკა და უნდა დაჯდეს მოლაპარაკების მაგიდასთან.
სომხეთისგან განსხვავებით, აზერბაიჯანი, რომელიც არის სამშვიდობო დღის წესრიგის ინიციატორი და რომელიც სწრაფად მუშაობს ოკუპაციისგან გათავისუფლებულ ჩვენს ტერიტორიებზე ფართომასშტაბიანი რეკონსტრუქციისა და სატრანსპორტო კომუნიკაციების გახსნაზე, არ არის დაინტერესებული რეგიონში დაძაბულობის შექმნით. თუმცა, ნებისმიერი პროვოკაცია ჩვენი ქვეყნის წინააღმდეგ მტკიცედ იქნება აღკვეთილი“.
