ვიდრე პრორუსული „ქართული ოცნება“ ბიძინა ივანიშვილის დავალებით, მართლმსაჯულების სისტემას მართავს, მანამდე ჩვენ წინ ვერ წავალთ, ვერ მივიღებთ კანდიდატის სტატუსს, - ამის შესახებ პარლამენტში გამართულ ბრიფინგზე „სტრატეგია აღმაშენებლის" თავმჯდომარე გიორგი ვაშაძემ განაცხადა, რითაც გამოეხმაურა მედიაში გავრცელებულ ინფორმაციას, რომ უზენაესი სასამართლოს თავმჯდომარე ნინო გვენეტაძე აიძულეს თანამდებობიდან წასულიყო.
ვაშაძის თქმით, არსებული მართლმსაჯულების სისტემის გამო, საქართველო ისტორიულ შანსს დაკარგავს.
„სასამართლოს კლანურ, ორგანიზებულ დანაშაულებრივი ჯგუფი ვიდრე იქნება ქართულ მართლმსაჯულებაში, ჩვენ ვერ მივიღებთ კანდიდატი ქვეყნის სტატუსს.
ჩვენ ვნახეთ შემზარავი ფაქტები, როგორ აიძულეს უზენაესი სასამართლოს თავმჯდომარე, სუს-ის, სხვადასხვა სამართალდამცავი ორგანოების, შანტაჟის საფუძველზე გადამდგარიყო დაკავებული თანამდებობიდან. სწორედ ასეთი ფაქტები არის მიუღებელი ევროკავშირისთვის.
როგორ შეიძლება საქართველომ მიღოს კანდიდატი ქვეყნის სტატუსი თუ სასამართლოში არის ორგანიზებულ დანაშაულებრივი ჯგუფი.
მივმართავ საქართველოს მოქალაქეებს, ვიდრე კლანი და ორგანიზებულ დანაშაულებრივი ჯგუფი, ვიდრე პრორუსული „ქართული ოცნება" ბიძინა ივანიშვილის დავალებით, მართავს მართლმსაჯულების სისტემას, მანამდე ჩვენ წინ ვერ წავალთ, ვერცერთი ადამიანის უფლება ვერ იქნება დაცული საქართველოში, მუდმივად სასამართლო იქნება გამოყენებული პოლიტიკური მიზნებისთვის, რაც მთავარია სასამართლო იქნება გამოყენებული იმ კორუფციული მომხვეჭელობის უზარმაზარი ფართო მასშტაბიანი სქემისთვის, რომელიც აღარიბებს საქართველოს თითოეულ მოქალაქეს, საქართველოში არ შემოვა ინვესტიცია, საქართველო ვერ მიიღებს ევროკავშირის კანდიდატის სტატუს და ამ ისტორიულ შანსს გავუშვებთ ხელიდან.
12 პუნქტში, რაზეც ხშირად არის საუბარი და ჩვენგან ითხოვს ევროკავშირი, სწორედ მთავარი ფუნდამენტური მოთხოვნა არის მართლმსაჯულების საკითხი, სასამართლოს ამ კლანური, ორგანიზებულ დანაშაულებრივი ჯგუფიდან გათავისუფლების საკითხი.
ჩვენ მოვისმენთ პრორუსული „ქართული ოცნების" წარმომადგენლების განცხადებას თითქოს არაფერია, მაგრამ დღესავით ნათელია და კიდევ ერთხელ გამოჩნდა თუ რამხელა დანაშაულებრივი სქემა ააწყო „ქართულმა ოცნებამ“ მართლმსაჯულებაში“, - განაცხადა ვაშაძემ.
მისივე თქმით, მანამდე იყო ასევე ინფორმაცია იმის თაობაზე, „თუ როგორ მიჰყავთ თვითმკვლელობამდე უზენაესი სასამართლოს მოსამართლეები, როგორ კეტავენ ოთახებში, როგორ აიძულებენ მიიღონ პოლიტიკური გადაწყვეტილება და ეს გადაწყვეტილებები მხოლოდ პოლიტიკოსებს და პოლიტიკურ პატიმრებს კი არ შეეხებათ, არამედ მათ ბიზნესებს“.
მისივე თქმით, კანდიდატის სტატუსის მისაღებად სასამართლო აუცილებელია ე.წ. კლანისგან გათავისუფლდეს.
„ჩვენი ამოცანაა გავათავისუფლოთ ამ კლანიდან და ორგანიზებულ დანაშაულებრივი ჯგუფიდან, ქართული მართლმსაჯულება, რომელიც შექმნა ,,ქართულმა ოცნებამ" და ასეთ შემთხვევაში ევროკავშირის კანდიდატის სტატუსიც იქნება, ინვესტიციებიც შემოვა საქართველოში, საქართველოს თითოეული მოქალაქის უფლებები იქნება დაცული სასამართლოში და რაც მთავარია სამუშაო ადგილებიც შეიქმნება და ამ უმძიმესი გაჭირვების ჭაობიდან ამოვალთ,"- განაცხადა ვაშაძემ.
(ipn)
