ივანიშვილის რეჟიმი პროდასავლური მედიის შესავიწროებლად ახალი ინსტრუმენტის შექმნას ცდილობს, რაც დიდ საფრთხეს წარმოადგენს, - ასე ეხმაურება „ევროპული საქართველოს“ თავმჯდომარე, გიგა ბოკერია „მაუწყებლის შესახებ“ კანონში ცვლილებების პროექტს.
როგორც ბოკერია განმარტავს, სურთ მედიის შინაარსობრივ რეგულირებაში შევიდნენ, რაც საფრთხეა.
„აქ მნიშვნელოვანია ის, რომ თავის დროზე, ვარდების რევოლუციის დროს, როცა ეს კანონი იქნა მიღებული, პრინციპული საკითხი იყო, რომ ნებისმიერი შინაარსთან დაკავშირებული ამბავი თვითრეგულირების საკითხი ყოფილიყო. ანუ არა კომისიის, ან სასამართლოს, ან ნებისმიერი სახელმწიფო ორგანოს, არამედ მედიის თვითრეგულირების.
თუ ადამიანი თვლიდა, რომ მას ცილი დასწამეს, ამას სიტყვის თავისუფლების კანონი არეგულირებს და მაშინ უნდა წავიდეს სასამართლოში. ეს გაკეთდა შეგნებულად, სწორედ იმ საფრთხეებიდან გამომდინარე, რომელსაც არამხოლოდ ასეთი კატასტროფული, არამედ ნებისმიერი მთავრობა სუსტი დემოკრატიის ტრადიციის პირობებში წარმოადგენს.
ახლა ამ პრინციპული საკითხის შეცვლა უნდათ, რომ მედიის შინაარსობრივ რეგულირებაში შევიდნენ და ეს, რა თქმა უნდა, არის საფრთხე“, - განაცხადა გიგა ბოკერიამ.
IPN.ge
