ამ კანონპროექტზე ვეტოს არდადება არ შეიძლებოდა, თუნდაც მარტო იმიტომ, რომ ყალბი პროცედურით იქნა მიღებული, ამის შეგუება არ შეიძლება, - ამის შესახებ პარლამენტის წევრმა, შალვა შავგულიძემ ე.წ. მოსმენების კანონთან დაკავშირებით პრეზიდენტის მოტივირებული შენიშვნების განხილვისას განაცხადა.
როგორც მან პარლამენტის პლენარულ სხდომაზე აღნიშნა, თუ ასეთი პრაქტიკა დაინერგება, საკომიტეტო განხილვები ფიქციად იქცევა.
„ჩვენ თუ ამ პრაქტიკას დავნერგავთ, მივიღებთ, რომ საკომიტეტო განხილვები ფიქციად იქცევა. კომიტეტზე დავპატიჟებთ ხალხს, ისინი იმსჯელებენ, კომიტეტი კენჭს უყრის რაღაც კანონპროექტს, დავურიგებთ პარლამენტის წევრებს, როგორც ეს დაგვირიგდა, მაგრამ სინამდვილეში კანონპროექტს შეცვლიან“, - განაცხადა შავგულიძემ.
მისი თქმით, მეორე მოსმენაზე ინიციატორებმა აბსოლუტურად სხვა კანონპროექტი წარმოადგინეს.
„პლენარულ სხდომაზე ბატონმა რატი იონათამიშვილმა კანონპროექტის კითხვა ზეპირად დაიწყო. როდესაც თვალი მივადევნე, აბსოლუტურად სხვა კანონპროექტს კითხულობდა, აბსოლუტურად განსხვავებულს. სინამდვილეში, მეორე მოსმენაზე ინიციატორებმა წარმოგვიდგინეს სხვა კანონპროექტი. შეიძლებოდა თუ არა ეს? არ შეიძლებოდა, ვინაიდან პარლამენტის რეგლამენტი მკაცრად განსაზღვრავს, კანონპროექტში ცვლილებების შეტანა, როგორც კომიტეტის სხდომაზე, ისე პლენარულ სხდომაზე შესაძლებელია, მაგრამ იმ შემთხვევაში, თუ შენიშვნა იქნება გამოთქმულ წერილობით ან ზეპირად, მას მომხსენებელი გაიზიარებს ან კენჭისყრით მიიღებს კომიტეტი ან პლენარული სხდომა.
ასეთი რამ კი არ მოხდა, კომიტეტმა მიიღო ერთი კანონპროექტი მეორე მოსმენით, დაგვირიგდა ყველას და სადღაც დაიწერა სხვა კანონპროექტი. ის ინკლუზიურობა, ის ჩართულობა, რომლითაც უნდათ ეს პროცესი გაამართლონ, ყველაფერი წყალში ჩაიყარა და მეორე მოსმენით აბსოლუტურად სხვა კანონპროექტი გამოგვიტანეს“,-განაცხადა შავგულიძემ.
მისი შეფასებით, აღნიშნული კანონპროექტი ორ ძალიან სერიოზულ ხარვეზს შეიცავს.
„პირველი, ის ითვალისწინებს ფარული საგამოძიებო მოქმედების ხანგრძლივობის ვადის იმდენჯერ გაგრძელებას პროკურორის შუამდგომლობის საფუძველზე, რამდენჯერაც ამას სასამართლო საჭიროდ მიიჩნევს. ფაქტობრივად, უსასრულოდ შეიძლება ფარული მიყურადება - თვალთვალის გაგრძელება, თუ ამას სასამართლო საჭიროდ მიიჩნევს. ასევე, არსებობს ასეთი ძლიერი დაცვის მექანიზმი, პირადი ცხოვრების ფარულ ღონისძიებებთან დაკავშირებით, რომ ფარული ღონისძიებების დასრულების შემდეგ უნდა ეცნობოს პირს ამ ღონისძიებების მის მიმართ გამოყენების თაობაზე. ამით პირს უფლება ეძლევა სასამართლოში გაასაჩივროს მის მიმართ გამოყენებული ღონისძიებების კანონიერება. ეს იმავდროულად ახდენს შემაკავებელ ფუნქციას, რომ გამოძიებამ ხელაღებით ვერ გამოიყენოს ფარული ღონისძიებები, მიყურადება, თვალთვალი და ასე შემდეგ“,-განაცხადა შავგულიძემ.
IPN.ge
