სამწუხაროდ, არა მხოლოდ საქართველოს ხელისუფლების მხრიდან რუსეთთან კეკლუცობის პოლიტიკას ვხედავთ, არამედ, საქართველო უმძიმეს ჩიხში შევიდა, - ამის შესახებ „ერთიანი ნაციონალური მოძრაობის“ ერთ-ერთმა ლიდერმა, ხატია დეკანოიძემ ამერიკელი კონგრესმენის, ადამ კინზინგერის განცხადების შეფასებისას აღნიშნა.
დეკანოიძის თქმით, ადამ კინზინგერმა თავისი განცხადებით, რომ საქართველომ რუსეთთან ფლირტი უნდა შეწყვიტოს, საქართველოს ხელისუფლების დღევანდელი პოზიცია კარგად აღნიშნა.
„სამწუხაროდ, არა მხოლოდ საქართველოს ხელისუფლების მხრიდან რუსეთთან კეკლუცობის პოლიტიკას ვხედავთ, არამედ, საქართველო უმძიმეს ჩიხში შევიდა, როდესაც უკრაინასთან მიმართებაში ჩვენი ხელისუფლების პოზიცია იყო და არის სამარცხვინო, როდესაც საქართველომ უმნიშვნელოვანესი გეოპოლიტიკური შანსი ხელიდან გაუშვა, როდესაც საქართველოს ხელისუფლებამ ასოცირებული ტრიო დაშალა და როდესაც საქართველო უკრაინისთვის შავი ზღვიდან ბალტიის ზღვამდე უსაფრთხოების ქამრის მიმართულებით, ერთ-ერთი ყველაზე უფრო მნიშვნელოვანი საიმედო სტრატეგიული პარტნიორი არ არის. როგორ ჩანს, საქართველოს ხელისუფლებას უკრაინის გამარჯვება არ უნდა“, - განაცხადა დეკანოიძემ.
ხატია დეკანოიძე რუსთაველის გამზირზე, უკრაინის დამოუკიდებლობის დღისადმი მიძღვნილ აქციაზე იმყოფება და მეგობარ ქვეყანას მხარდაჭერა კიდევ ერთხელ გამოუცხადა.
„დღეს უმნიშვნელოვანესი დღეა, არა მხოლოდ უკრაინისთვის, როგორც უკრაინის დამოუკიდებლობის დღე, არამედ მთელი მსოფლიოსთვის და ცივილიზაციისთვის, ვინაიდან უკრაინა უმნიშვნელოვანეს ბრძოლაში იმყოფება. რა თქმა უნდა, ძალიან მალე გაიმარჯვებს. მისი გამარჯვება არის ჩვენი გამარჯვება. მისი გამარჯვება არის თავისუფლების გამარჯვება, ამიტომ ვისაც რა შეგვიძლია ყველაფერი უნდა გავაკეთოთ იმისთვის, რომ უკრაინამ გაიმარჯვოს“, - განაცხადა ხატია დეკანოიძემ.
შეგახსენებთ, ამერიკელი კონგრესმენი მედიაში გავრცელებულ ინფორმაციას გამოეხმაურა, რომლის თანახმადაც, თბილისში ჩეჩნეთის ლიდერის რამზან კადიროვის მრჩეველი და მოკავშირე და ქართველი მომღერლის ქეთა თოფურიას ქმარი, ლევ დენგოვი დააფიქსირეს, რომელმაც ადრე ოკუპირებული ტერიტორიების შესახებ საქართველოს კანონი დაარღვია.
„რუსეთის, როგორც რეგიონალური ძალის, დღეები იწურება. საქართველოს მტკიცედ ვურჩევ, სერიოზულად მოეკიდოს ამას და რუსეთთან ფლირტი შეწყვიტოს, - განაცხადა ადამ კინზინგერმა.
IPN.ge
