მინერალური რესურსების ეროვნული სააგენტო „ნაციონალური მოძრაობის“ მიერ გავრცელებულ ინფორმაციას ეხმიანება, რომელიც ბოლნისისა და მარნეულის მუნიციპალიტეტების ტერიტორიაზე სასარგებლო წიაღისეულის მოპოვებას შეეხებოდა და აცხადებენ, რომ მინერალური რესურსების ეროვნული სააგენტოს მიერ გამოცხადებული აუქციონი, უპირველესად, გულისხმობს ლიცენზიანტის მიერ კონკრეტულ ტერიტორიულ არეალებში არსებული მარაგების შესწავლას, სასარგებლო წიაღისეულის სახეობისა და ოდენობების განსაზღვრას და სახელმწიფოსთვის ანგარიშის წარმოდგენას, რისთვისაც 5 წლიანი პერიოდია განსაზღვრული.
მათივე განცხადებით, აქედან გამომდინარე, ამ კვლევების ჩატარებამდე და ანგარიშის მომზადებამდე რომელიმე „ექსპერტის“ მიერ გამოთქმული მოსაზრება, რომ ასობით ჰექტარი მიწის გადათხრა და ეკოლოგიური კატასტროფა იგეგმება, „რბილად რომ ვთქვათ, არის პოლიტიკური ქულების მოპოვების უნიჭო მცდელობა და ტყუილი“.
„რეალური ვითარება ასეთია: სსიპ მინერალური რესურსების ეროვნულმა სააგენტომ, 2022 წლის 30 მარტს სააგენტოში წარდგენილი განცხადების საფუძველზე, 2022 წლის 27 ივლისის N863/ს ბრძანებით, სასარგებლო წიაღისეულის შესწავლა-მოპოვების მიზნით, ლიცენზიის გასაცემად აუქციონი გამოაცხადა.
სალიცენზიო არეალებია ბოლნისისა და მარნეულის მუნიციპალიტეტების ტერიტორია. ლიცენზია 30 წლის განმავლობაში იქნება მოქმედი, მათ შორის სასარგებლო წიაღისეულის რესურსის შესწავლისათვის და მარაგების დამტკიცებისათვის ლიცენზიის გაცემიდან 5 წელია განსაზღვრული.
აუქციონის საწყისი ფასი 3 000 000 (სამი მილიონი) ლარს შეადგენს, ლიცენზიის მიღების შემთხვევაში კი ლიცენზიის მაძიებელი ვალდებული იქნება, დამატებითი სალიცენზიო ვალდებულებები შეასრულოს, მათ შორის ლიცენზიის ძალაში შესვლიდან არა უმეტეს 5 წლის ვადაში სასარგებლო წიაღისეულის რესურსის შესწავლა და Joint Ore Reserves Committee (JORC) კოდექსის შესაბამისად შედგენილი სასარგებლო წიაღისეულის მარაგების ანგარიშის შესაბამის ორგანოში დასამტკიცებლად წარდგენა უზრუნველყოს.
გარდა ამისა, ლიცენზიის ძალაში შესვლიდან 5 წლის ვადაში, ძებნა-ძიებითი სამუშაოების ჩატარების მიზნით, ჯამურად არანაკლებ 12 000 000 (თორმეტი მილიონი) აშშ დოლარის ექვივალენტი ლარის ოდენობის ინვესტიცია უნდა განახორციელოს, მათ შორის, ლიცენზიის ძალაში შესვლიდან 16 თვის ვადაში ძებნა-ძიებითი სამუშაოებისთვის განახორციელოს არანაკლებ 3 000 000 ლარის ოდენობის ინვესტიცია.
გამოცხადებული აუქციონი მიმდინარე წლის 30 აგვისტოს, 18:00 სთ-ზე დასრულდება. ამდენად, დღეის მდგომარეობით, აუქციონი მიმდინარეა, გასათვალისწინებელია ის გარემოება, რომ „სასარგებლო წიაღისეულის მოპოვების ლიცენზიის გაცემის წესისა და პირობების შესახებ დებულების დამტკიცების თაობაზე“ საქართველოს მთავრობის 2005 წლის 11 აგვისტოს N136 დადგენილებით დამტკიცებული დებულების მე-3 მუხლის 141 პუნქტის თანახმად, ელექტრონული აუქციონის დასრულებამდე ინფორმაცია აუქციონში მონაწილეთა შესახებ კონფიდენციალურია.
აქვე აღვნიშნავთ, რომ „RMG ჯგუფი“ დაინტერესებული მხარე არ ყოფილა, ის არ არის განმცხადებლებს შორის და ამის შესახებ გავრცელებული ინფორმაციაც არასწორია,“ - ნათქვამია განცხადებაში.
IPN.ge
