„ქართული ოცნების“ თავმჯდომარე ირაკლი კობახიძე და რეგიონული მდივანი დიმიტრი სამხარაძე ამბროლაურში, პარტიის რაჭა-ლეჩხუმ-ქვემო სვანეთის ადგილობრივი ორგანიზაციების ხელმძღვანელებს, მუნიციპალიტეტების მერებსა და საკრებულოს თავმჯდომარეებს შეხვდნენ.
შეხვედრაზე, რომელსაც ასევე ესწრებოდნენ ამბროლაურის, ონის, ცაგერის, ლენტეხისა და მესტიის მაჟორიტარი დეპუტატი გოჩა ენუქიძე და სახელმწიფო რწმუნებული რაჭა-ლეჩხუმ-ქვემო სვანეთის მხარეში პარმენ მარგველიძე, მმართველი პარტიის საშუალოვადიან გეგმებზე იმსჯელეს.
„ყველა რეგიონში გვაქვს დაგეგმილი შეხვედრა ჩვენი პარტიის, ჩვენი აქტივის წარმომადგენლებთან, საკრებულოების წევრებთან, მერებთან, გუბერნატორის მონაწილეობით. ვსაუბრობთ მიმდინარე პოლიტიკურ პროცესებზე, იმ მოვლენებზე, რომლებიც, გასული თვეების განმავლობაში, ჩვენს ქვეყანაში ვითარდებოდა. ასევე, ბუნებრივია, პარტიულ გეგმებზეც გვაქვს საუბარი. დღეს, ასეთი შეხვედრა რაჭა-ლეჩხუმ-ქვემო სვანეთის რეგიონში გვქონდა. ჩვენა თანაგუნდელებთან სწორედ ამ თემებზე ვისაუბრეთ“, - განაცხადა ირაკლი კობახიძემ.
რაჭა-ლეჩხუმ-ქვემო სვანეთის გარდა, მიმდინარე კვირაში, „ქართული ოცნების“ ლიდერები პარტიის აჭარისა და გურიის ადგილობრივი ორგანიზაციების ხელმძღვანელებს, მუნიციპალიტეტების მერებსა და საკრებულოს თავმჯდომარეებს შეხვდნენ.
(imedi)
