„ანტიკორუფციული მოძრაობის“ წევრის ირაკლი ფავლენიშვილის განცხადებით, მალე ევროპის მხრიდან კონკრეტული ნაბიჯები გადაიდგმება იმისთვის, რომ ექსპრეზიდენტ მიხეილ სააკაშვილის ტრანსფერი განხორციელდეს.
ფავლენიშვილმა დღევანდელ ბრიფინგზე ბრიუსელში ვიზიტი შეაჯამა და განაცხადა, რომ ევროპარლამენტარებთან შეხვედრისას საუბრის ერთ-ერთი მთავარი თემა სააკაშვილის ჰუმანიტარული ტრანსფერი იყო.
„ძალიან მნიშვნელოვანია მიხეილ სააკაშვილის ჰუმანიტარული ტრანსფერის საკითხი. დღეს, მისი ჯანმრთელობიდან გამომდინარე, ევროპელი კოლეგებისთვისაც აქტუალურია მისი ტრანსფერის საკითხი. კონკრეტული გზები და კონკრეტული საშუალებები არის ჩვენი კონსულტაციების საგანი. სულ მალე ევროპის მხრიდან კონკრეტული ნაბიჯები გადაიდგმება იმისთვის, რომ მიხეილ სააკაშვილის ტრანსფერი მოხდეს. სამწუხაროდ, თვითონვე აღიარებენ, რომ „ქართული ოცნება“ ამ მხრივ საოცარ შეუპოვრობას იჩენს. არათუ თანახმა არის მის ტრანსფერზე, არამედ აქამდე, სამედიცინო ექსპერტების, ევროპარლამენტარების შესვლასაც ეწინააღმდეგებოდა. ხდება ახალი საშუალებების ძიება ამ პროცესში. მარტო „ევროპის სახალხო პარტრიისთვის“ წარმომადგენლებთან არ მქონია შეხვედრა, „ლიბერალურ-დემოკრატიული ალიანსის“ წევრებთანაც, ასევე, „სოციალ-დემოკრატებშიც“ მიმდინარეობს საუბარი იმაზე, თუ როგორ შეიძლება შედარებით მისაღებ ფორმებში განხორციელდეს ჰუმანიტარული ტრანსფერი ისე, რომ „ქართული ოცნების“ შიშიც გავაქარწყლოთო“,- განაცხადა ფავლენიშვილმა.
ასევე, მისი თქმით, ბრიუსელში გამართული ვიზიტისას საუბრის ერთ-ერთი მთავარი თემა „მთავარი არხის“ გენერალური დირექტორის, ნიკა გვარამიას პატიმრობა იყო.
„ არსებობს ინტერპარტიული კონსენსუსი გვარამიას პოლიტიკურ ტყვეობასთან დაკავშირებით. „ბოლო წვეთი“-ასე უწოდებენ მოთმინების ფიალას გვარამიას დაპატიმრებას და იმ აბსურდულ საქმეს, რომელზეც ის ციხეში ზის. მიიჩნევენ, რომ ეს იყო დემონსტრაციული ნაბიჯი, რომლითაც საქართველოს ხელისუფლებამ მოახდინა დისტანცირება მოლდოვისა და უკრაინის დუეტისგან. ამიტომ მოუწოდებენ გვარამიას გათავისუფლებისკენ“,-განაცხადა ფავლენიშვილმა.
მისივე განმარტებით, „ქართული ოცნების“ დამფუძნებლის ბიძინა ივანიშვილის გარდა, ევროპარლამენტარები ცალკეული პირების სანქცირების საკითხსაც განიხილავენ.
