„ყველა მიმართულებით, რაც ქვეყნის სტაბილურობას განაპირობებს, გვაქვს პროგრესი და საქართველოს პროდასავლური კურსი შეუქცევადია”.
ამის შესახებ საქართველოს პარლამენტის თავმჯდომარემ, არჩილ თალაკვაძემ ტელეკომპანია „რუსთავის-2″-ის ეთერში განაცხადა.
“ბოლო 8 წლის განმავლობაში ქვეყნის სტაბილურობა და მშვიდობიანი განვითარება დაცულია როგორ შეიძლება ადამიანი [ბიძინა ივანიშვილი] დესტაბილიზაციაზე მუშაობდეს, თუ მისი გუნდი და მისი ხელმძღვანელობით გატარებული რეფორმები სტაბილურობაზე მუშაობს?! აშშ-სთან ჩვენი სტრატეგიული თანამშრომლობა არასოდეს ყოფილა ასე ძლიერი. საქართველო თავსებადია ნატო-ს სტანდარტებთან და ჩვენ ვაძლიერებთ დემოკრატიას ჩვენს ქვეყანაში. ამის დასტურია საერთაშორისო შეფასებებიც 2012 წლიდან დღემდე – საქართველო კორუფციისგან თავისუფლების ინდექსში 2012 წელს 51-ე იყო რეიტინგში, დღეს 44-ა; ბიზნესის კეთების თავისუფლებით მე-12 ადგილზე იყო, დღეს მეშვიდე პოზიციაზეა; სასამართლოს დამოუკიდებლობით და ეფექტიანობით- 89-ე ვიყავით რეიტინგში 2012 წელს, დღეს 66-ე ვართ. საკუთრების უფლების დაცვა- 120-ე ადგილზე ვიყავით 46-ე ვართ; მედიის თავისუფლება- 105-ზე ვიყავით, 64-ზე ვართ. NATO-ს შეფასების ანგარიშებში საქართველოს პროგრესი დადებითად არის შეფასებული; ევროკავშირი დადებითად აფასებს საქართველოს მიერ ასოცირების ხელშეკრულების განხორციელებას; აშშ სახელმწიფო დეპარტამენტი საქართველოს საიმედო პარტნიორად მიიჩნევს. ახლა მითხარით, ეს ყველაფერი არის “დესტაბილიზაცია” და რუსული გეგმა?!”-განაცხადა თალაკვაძემ.
