არანაირი არსებითი წარმატების მოლოდინი ევროკავშირის გაწევრიანების გზაზე, სანამ საქართველოში ივანიშვილის რეჟიმია, სამწუხაროდ, არ გამაჩნია,- ამის შესახებ ,,ევროპული საქართველოს” ლიდერმა გიგა ბოკერიამ მედიასთან განაცხადა.ამით მან ხელისუფლების მიერ ევროკავშირის კითხვარის მეორე ნაწილზე პასუხის გადაგზავნასთან დაკავშირებით დასმულ კითხვას უპასუხა.
მისივე განცხადებით, ევროკავშირის წევრობისათვის საჭიროა ლიბერალური განწყობები და აქტიური მუშაობა იმ დედაქალაქებში, სადაც სკეპტიკური დამოკიდებულება არსებობს, მაგრამ ,,ჩვენ არც ერთი გვაქვს და არც - მეორე”.
,,ქვეყნის ვითარება და იმ პოლიტიკური გუნდის მისწრაფება, რომელიც მართავს ქვეყანას - ივანიშვილი და მისი გარემოცვა, არის მთავარი, სანამ ეს არ შეიცვლება მანამდე კითხვარი რას შეცვლის? გვჭირდება პოლიტიკური ნება, რომ იყოს ევროპული ტიპის მმართველობა ქვეყანაში. გარდა ამისა, ევროკავშირის შიგნით არსებობს განწყობები ზოგიერთ ქვეყანაში, რომელიც არის ბარიერი. ამის გადასალახად ქვეყნის შიგნით საჭიროა ლიბერალური განწყობები, რომელიც არ გვაქვს. ასევე აქტიური მუშაობა იმ დედაქალაქებში, სადაც არსებობს სკეპტიკური დამოკიდებულება, ჩვენ არც ერთი გვაქვს და არც მეორე. უბრალოდ კითხვარის მიტანა არაფერი არ არის”, - აღნიშნა გიგა ბოკერიამ.
IPN.ge
