2022 წლის მარტში საქართველოში საკრედიტო ბარათების რაოდენობა რეკორდულად გაიზარდა. ერთთვიან ინტერვალში ზრდამ 41,4% შეადგინა, ერთწლიანში კი - 50.8%. უფრო კონკრეტულად, საქართველოს ეროვნული ბანკის სტატისტიკის მიხედვით, 2022 წლის 1-ლი აპრილის მდგომარეობით ქართულ ბაზარზე მიმოქცევაში იყო 827 966 ერთეული საკრედიტო ბარათი, 1-ლი მარტის მდგომარეობით კი 585 326, ანუ ერთ თვეში ბანკებმა დამატებით 242 640 ერთეული საკრედიტო ბარათი გასცეს. 2021 წლის 1-ლი აპრილისთვის სულ გაცემული იყო 548 730 საკრედიტო ბარათი.
რაც შეეხება სადებეტო ბარათებს, აქ კლება დაფიქსირდა, თუმცა მინიმალური რაოდენობით. კერძოდ, სებ-ის სტატისტიკის მიხედვით, 1-ლი აპრილისთვის ქვეყანაში 6 273 593 სადებეტო ბარათი მოქმედებდა, 1-ლი მარტის მდგომარეობით კი 6 274 957 ბარათი.
საანგარიშო პერიოდში, 1-ლი აპრილის მდგომარეობით საქართველოში VISA-ს 2 212 426 სადებეტო ბარათია, Mastercard/Maestro-ს ბარათების რაოდენობა 3 719 394 შეადგენს, სხვა სისტემების სადებეტო ბარათების რაოდენობა კი 341 773-ია.
სადებეტო ბარათების წილები გადახდის სისტემების მიხედვით ასეთია:
- Mastercard/Maestro - ბაზრის 59,2%
- VISA - ბაზრის 35,2%
- სხვა სისტემები - ბაზრის 5.4%
საკრედიტო ბარათების ბაზარი კი საგადახდო სისტემებს შორის ასე ნაწილდება:
- VISA - ბაზრის 20,6%
- Mastercard/Maestro - ბაზრის 12,9%
- სხვა სისტემები - ბაზრის 66,4%
(bpn)
