პარტია „საქართველოსთვის“ ერთ-ერთი ლიდერის ნათია მეზვრიშვილის განცხადებით, "ქართული ოცნების" დამფუძნებელ, აუდიოჩანაწერი, რომელშიც სავარაუდოდ, ბიძინა ივანიშვილი და რუსი ოლიგარქი, ვლადიმერ ევტუშენკოვი საუბრობენ, ქვეყნისთვის დამაზიანებელია.
როგორც მან „პალიტრანიუსის“ გადაცემაში „პოლიტიკური სივრცე“ განაცხადა, აღნიშნულ საკითხზე გამოძიება უნდა დაიწყოს და შესაბამისმა უწყებებმა განმარტება გააკეთონ.
მეზვრიშვილის თქმით, დღეს საზოგადოებამ დაინახა, რომ "ბიძინა ივანიშვილი პოლიტიკიდან წასული არ არის" და ამ ყველაფერში უბედურება ის არის, რომ "პრემიერი, რომელიც სკამზე ზის, არავინაა"
„სამწუხაროდ, ახლა „ქართული ოცნება“ იმ კონდიციაში იმყოფება, როდესაც განსაკუთრებით საშიშია ამ ქვეყნისთვის და ამ ქვეყნის მომავლისთვის იმიტომ, რომ ჩვენ პრაქტიკულად, გზაგასაყარზე ვართ, საბჭოთა კავშირისკენ გადავდგათ ნაბიჯები უკან, თუ წინ წავიდეთ თავისუფალი, დემოკრატიული დასავლეთისკენ. ევროკავშირში გაწევრიანებაზე განაცხადი გვაქვს გაკეთებული და ამ ფონზე, როდესაც ხელისუფლების მიმართ ასეთი მძიმე ბრალდება ჟღერდება, პირველ რიგში, ქვეყნისთვის არის დამაზიანებელია. ამ ჩანაწერის ავთენტურობზე აღარ ვსაუბრობ, რადგან ქვეყანაში არ დარჩა უწყება, რომელიც ამის ავთენტურობას ისე გადაამოწმებს, კითხვის ნიშნები არ გაჩნდება. აბსოლუტურად ყველა ინსტიტუტი, რომელმაც ჩანაწერის ავთენტურობა უნდა შეამოწმოს, იქნება ეს სუს-ი, შსს, პროკურატურა თუ სხვა, აბსოლუტურად ყველა ინსტიტუტი პარტიაზე არის დაქვემდებარებული. ერთ-ერთი ინდიკატორი, რითაც ჩვენ შეგვიძლია გავზომოთ ეს ინსტიტუტები მართლა ექვემდებარებინ თუ არა პარტიას, ამ ყველაფერზე რეაგირება იქნება, რაც გუშინ გავრცელდა, ამაზე
„ოცნება“ როგორ რეაგირებას მოახდენს. ჩვენ დავინახეთ, რომ ბიძინა ივანიშვილი, რომელმაც განაცხადა, რომ პოლიტიკიდან წავიდა, თურმე პოლიტიკიდან წასული არ არის“,-განაცხადა მეზვრიშვილმა.
როგორც მან აღნიშნა, ხელისუფლების ინტერესში უნდა იყოს ის, რომ ამ ჩანაწერის თაობაზე არსებული კითხვის ნიშნები მოიხსნას.
„ივანიშვილი პასუხისმგებლობას ვერ გაექცევა, ეს ჩანაწერი ადასტურებს იმას, რომ ის აქტიურად არის ჩართული გადაწყვეტილებების მიღების პროცესში, პრემიერს შეხვედრებს უნიშნავს. ქვეყნის უსაფრთხოებისთვის ასეთ კრიტიკულ სიტუაციაში პრემიერი გვყავს, რომელიც არავინ არის. პრემიერი გვყავს, რომელსაც შეხვედრებს უნიშნავს ადამიანი, რომელსაც რუს ოლიგარქებთან და პუტინთან დაახლოებულ პირებთან მჭიდრო კონტაქტები აქვს, ყველაზე დიდ უბედურება ამ ყველაფერში ეს არის, ანუ, პრემიერი, რომელიც სკამზე ზის, არავინ არის. ახლა ნება უნდა იბოძოს ბატონმა ივანიშვილმა და ამ საკითხთან დაკავშირებით განმარტებები გააკეთოს, მარტო ღარიბაშვილმა კი არა, ღარიბაშვილი ამაზე პასუხისმგებლობას ვერ გაექცევა და მან თავისი წილი პასუხი უნდა აგოს“, - განაცხადა მეზვრიშვილმა.
IPN.ge
