უკრაინა-რუსეთის ომმა შექმნა მართლაც ახალი გამოწვევები. ჯერ კიდევ არ იყო დასრულებული პანდემია, როდესაც ომმა სრულიად შეცვალა რეალობა და არა მხოლოდ რეგიონში, არამედ მთელ მსოფლიოში. ჩვენ დავინახეთ, რომ ტენდენციები ფასების ზრდის არის ყველა ქვეყანაში, შესაბამისად, ეს არის გამოწვევა, რომელიც ნებისმიერ მთავრობას უდგას, - ამის შესახებ ეკონომიკის მინისტრმა ლევან დავითაშვილმა განაცხადა.
მისი თქმით, როდესაც მსოფლიოში ომია, მნიშვნელოვანია მაქსიმალურად კონსოლიდირებული ვიყოთ და ერთმანეთის მიმართ ნდობა და კოორდინაცია გვქონდეს.
მინისტრის შეფასებით, ფასების ზრდის ტენდენცია ძირითადად მიწოდების დარღვევით და საწვავის რეკორდულად მაღალი ფასებით არის გამოწვეული.
„შესაბამისად, ჩვენთვის რა თქმა უნდა, ძალიან ბევრი გამოწვევაა დამატებით, რადგან გარდა გლობალური ტენდენციებისა, პირდაპირ აისახება საქართველოს ეკონომიკაზე, რადგან საქართველოს სავალუტო შემოსავლების ძალიან დიდი ნაწილი მოდის ორ ქვეყანაზე - უკრაინასა და რუსეთზე, ასევე ტურიზმის მხრიდან შემოსავლებზე და ჩვენ, რა თქმა უნდა, ამ სიტუაციაში ვმუშაობთ იმაზე, რომ გარკვეულად დავაბალანსოთ ის პრობლემები, რომლებიც ამ შემთხვევაში იქმნება. მათ შორის, ერთ-ერთი არის ახალი პროგრამა, რომელიც საერთაშორისო სავალუტო ფონდთან გავაფორმეთ, რომელიც არის „სტენდ-ბაი“ რეჟიმში. ჩვენ ვიღებთ 249 მილიონ დოლარს, ეს არის დამატებითი ფინანსური რესურსები, მყარი ვალუტა, რომელიც მოგვცემს შესაძლებლობას, რომ გამოვიყენოთ სხვადასხვა საჭიროების მიხედვით, რომ ჩვენი მაკროეკონომიკური სტაბილურობა შევინარჩუნოთ. ძალიან მნიშვნელოვანი იყო, რომ ჩვენ აგვეცილებინა პანიკა და ჩვენ მოსახლეობასთან გვქონდა მუდმივი კომუნიკაცია, რომ როდესაც ეკონომიკური მაჩვენებლები არის ჯანსაღი, როდესაც ჯერჯერობით მაკროეკონომიკური სტაბილურობა არის სახეზე, ამ შემთხვევაში პანიკა იყო აბსოლუტურად უსაფუძვლო. ეს უკავშირდებოდა სავალუტო კურსს, რომელიც დასტაბილურდა და ამაზე არა ერთი საუბარი გვქონდა ჩვენ მოსახლეობასთან და ბიზნესთან. მნიშვნელოვანია, რომ ასეთ სიტუაციაში, როდესაც ომია მსოფლიოში, ვიყოთ მაქსიმალურად კონსოლიდირებული და გვქონდეს მაქსიმალური კოორდინაცია. დღევანდელი შეხვედრაც ბიზნესთან ამას ემსახურება და ეს მეტი დიალოგი და კომუნიკაცია და მეტი ნდობა ერთმანეთის მიმართ იქნება სასარგებლო, იმიტომ, რომ ეს უნდა გამოვიჩინოთ და ასეთ სიტუაციაში სოლიდარობას, ერთიანობას ალტერნატივა არ აქვს“, - განაცხადა დავითაშვილმა.
(lpn)
