თუ უკრაინაში რუსეთის მხრიდან ღია აგრესია და ომი, სამხედროების და მშვიდობიანი მოქალაქეების დახოცვა მიმდინარეობს, საქართველოში ამის პარალელურად, სამწუხაროდ, ჰიბრიდული ომი მიმდინარეობს - მე თქვენ ყველას გთხოვთ, მათ შორის, ოპოზიციას, ოპოზიციის იმ ნაწილს, რომელიც "ნაცმოძრაობას" არის აყოლილი, "ნაცმოძრაობის" ტელევიზიებს, რომ ამ ჰიბრიდული ომის ჯარისკაცები ნუ გახდებით“, - ამის შესახებ ფრაქცია "ქართული ოცნების" თავმჯდომარე მამუკა მდინარაძემ ოკუპირებული ცხინვალის რეგიონის დე ფაქტო პრეზიდენტის, ანატოლი ბიბილოვის მიერ გაკეთებულ განცხადებაზე დასმული კითხვის საპასუხოდ აღნიშნა.
მისივე თქმით, ანატოლი ბიბილოვის განცხადება "ოკუპანტი ქვეყნის ხელისუფლებაშიც" კი არ განიხილება და ეს ნათქვამი მის არალეგიტიმური არჩევნების მიზნებს ემსახურება.
მდინარაძის თქმით, საქართველო ოკუპირებულ ტერიტორიებს მშვიდობიანი გზით დაიბრუნებს და მმართველი გუნდი ყველაფერს აკეთებს იმისთვის, რომ საქართველოში ომი არ დაუშვას.
„საქართველო გრძელვადიან სამშვიდობო პოლიტიკას აწარმოებს და ეს საბოლოო ჯამში, დეოკუპაციის წყარო და საფუძველი იქნება. ჩვენ ამაში ღრმად ვართ დარწმუნებულები და ამიტომ მიზანმიმართულად ვდგამთ იმ ნაბიჯებს, რასაც მეორე მხრიდან ჰიბრიდული ომი უპირისპირდება.
დღეს საქართველოში ჰიბრიდული ომი, ცივი ომი მიმდინარეობს. თუ უკრაინაში რუსეთის მხრიდან ღია აგრესია და ომი, სამხედროების და მშვიდობიანი მოქალაქეების დახოცვა მიმდინარეობს, საქართველოში ამის პარალელურად, სამწუხაროდ, ჰიბრიდული ომი მიმდინარეობს. ამის მონაწილეები ნებით თუ ნების გარეშე, ზოგჯერ ქვეყნის შიგნით მყოფი ადამიანები, ოპოზიციად წოდებულები, მათი ტელევიზიების წარმომადგენლები, ქვეყნის გარეთ ოკუპანტი ქვეყნის წარმომადგენლები, მათ შორის, ე.წ. სამხრეთ ოსეთის ლიდერები და ა.შ. გვევლინებიან ხოლმე. ამიტომ ჩვენ უნდა შევძლოთ, რომ მშვიდობიანი პოლიტიკის ფარგლებში ასე მიზანმიმართულად გავაგრძელოთ დეოკუპაციისკენ სვლა, განვითარებით და მშვიდობით. ეს არის ერთადერთ წყარო და საფუძველი, რითაც ჩვენ, ჩვენი ძმები და დები და ჩვენი ტერიტორიები უნდა დავიბრუნოთ.
მე თქვენ ყველას გთხოვთ, მათ შორის ოპოზიციას, ოპოზიციის იმ ნაწილს, რომელიც აყოლილია "ნაცმოძრაობას", "ნაცმოძრაობის" ტელევიზიებს, რომ ნუ გახდებით ამ ჰიბრიდული ომის ჯარისკაცები. ამ ომის ჯარისკაცები არავინ არ უნდა გახდეთ. ეს უნდა შეძლოთ და ეს არის საქართველოსთვის გაკეთებული საქმე, თუ თქვენ ამას შეძლებთ და თავს ზევით ძალას იპოვით," - განაცხადა მდინარაძემ.
