ხორბილისა და ფქვილის მწარმოებელთა ასოციაციის ხელმძღვანელი ლევან სილაგავა ,,ბიზნესპრესნიუსთან“ აცხადებს, რომ ქვეყანას ხორბლისა და ფქვილის 2-თვიანი მარაგი გააჩნია, ამის შემდეგ კი სუბსიდირების მექანიზმის ამოქმედება პრაქტიკულად, გადაწყვეტილია.
„მსოფლიო ბაზარზე ფასები მნიშვნელოვნადაა გაზრდილი, იქედან გამომდინარე, რომ ამ პერიოდში მსოფლიოს მოაკლდა ხორბლის მიწოდების 30%. უკრაინა თავისთავად და რუსეთშიც იყო დეფიციტი. ქვეყნები ყიდულობენ იმაზე მეტ ხორბალს, ვიდრე ჩვეულებრივ დროში. ფასები გაზრდილია, ომის დაწყებამდე თუ ტონა ხორბლის ფასი იყო 320-330 დოლარის ფარგლებში, დღეს არის 420 დოლარი. ფასების მერყეობა საკმაოდ მაღალია.
საქართველოში 90% შემოდის რუსეთიდან, ლოგისტიკური კუთხით მთლიანობაში ყველაზე იაფი შემოტანა არის რუსეთიდან. ხორბალზე გვაქვს ერთი თვის მარაგი და ფქვილზე დაახლოებით ერთი თვის. ეს არის სტანდარტი, რომელიც სასურსათო უსაფრთხოების თემაში ჯდება, ამის იქით ვაკეთებთ იმას, რომ მარაგის პარალელურად შემოდის ის დაახლოებითი რაოდენობა, რაც ვთქვათ იხარჯება, ეს არის მუშა პროცესი. ნაწილი შემოდის რუსეთიდან, არის ძველი კონტრაქტები მულტინაციონალურ კომპანიებთან, მათ აქვთ ოფისები შვეიცარიაში, საფრანგეთში. აქვთ პირობა, რომ შეასრულონ კონტრაქტები. გარკვეულწილად, ეს მოდის რუსეთიდან, მაგრამ პოლიტიკური სიტუაციიდან გამომდინარე ქვეყნები აკეთებენ გადალაგებას.
უკრაინაში თავისთავად კითხვის ნიშნის ქვეშაა, დაიწყება თუ არა ხვნა-თესვის სამუშაოები, რუსეთში კი, 20%-ით სამუშაოების დაწყებ.
ამ ყველაფრიდან გამომდინარე, ჩვენი გამოწვევა არის, გადავერთოთ სხვა ქვეყანაზე და ამაში გვეხმარება 2-თვიანი მარაგი, რომელიც ახლა ქვეყნის შიგნითაა და რის გამოც შესაძლებლობა გვაქვს გადასვლა მოხდეს უმტკივნეულოდ. მარაგების თემა ამიტომაა ასეთი მნიშვნელოვანი, რომ ერთგვარი ბუფერია.
ყაზახეთი არის ალტერნატივა, ალტერნატივა არის რუმინეთიც და ამ მიმართულებით მუშაობის დრო გვაქვს. ამ ეტაპზე, როგორიცაა მდგომარეობა ამ მოცემულობით პურზე ფასის შენარჩუნება ჩარევის გარეშე მოხდება. შემდეგ კი, შეიძლება ითქვას, 99%-ით გადაწყვეტილია ხორბლის სუბსიდირება და სავარაუდოდ, მთავრობის შემდგომ სხდომაზე, იქითა კვირაში ეს საკითხი გავა. ახლა პარამეტრებზეა საუბარი, რა ჩაიწერება დადგენილებაში“, - განაცხადა სილაგავამ ,,ბიზნესპრესნიუსთან“.
(bpn)
