საინვესტიციო კომპანია Galt&Taggart-მა ტურიზმის შესახებ განახლებული მიმოხილვა გამოაქვეყნა. დოკუმენტში აღნიშნულია, რომ რუსეთ-უკრაინის ომის ფონზე საქართველოს 2022 წელს ტურიზმიდან მისაღები შემოსავლების მოცულობა შეუმცირდება. როგორც დოკუმენტში ვკითხულობთ, ომის მოკლევადიან პერიოდში დასრულების შემთხვევაში 2022 წელს ტურიზმიდან შემოსავლები 2019 წელთან მიმართებით 75%-ით აღდგება, ხოლო იმ შემთხვევაში, თუ ომი შედარებით გაიწელა, მაშინ წელს შემოსავლების აღდგენის დინამიკა მხოლოდ 60% იქნება. აქვე იმასაც შეგახსენებთ, რომ ომის დაწყებამდე საინვესტიციო კომპანია წელს ტურიზმიდან შემოსავლების 85%-ით აღდგენას პროგნოზირებდა.
რაც შეეხება გასული წლების მონაცემებს, უნდა აღინიშნოს, რომ 2019 წელს საქართველო ტურიზმიდან 3,3 მლრდ აშშ დოლარის შემოსავალი მიიღო, რაც ჩვენი მთლიანი ეკონომიკის 18.7%-ს შეადგენდა. 2021 წელს ცხადია ეს მაჩვენებელი შემცირდა და შემოსავლის სახით საქართველომ მხოლოდ 1,2 მლრდ აშშ დოლარი მიიღო - ჩვენი ეკონომიკის 6.4%.
შესაბამისად გამოდის, რომ ომის მოკლევადიან პერიოდში დასრულების პირობებში წელს საქართველო ტურიზმიდან 2,475 მლრდ აშშ დოლარი შემოსავალს მიიღებს, ხოლო ომის გაჭიანურების პირობებში - მხოლოდ 1,98 მლრდ აშშ დოლარს. შეგახსენებთ, რომ ომის არარსებობის პირობებში საქართველოს წელს ტურიზმიდან 2,805 მლრდ დოლარის შემოსავალი უნდა მიეღო.
(bpn)
