უწყების ცნობით, სოციალურ ქსელ ტელეგრამში არსებული სპეციალური ბოტ-ჩატი შეაგროვებს მომხმარებელთა მიერ გაგზავნილ ინფორმაციას, რომელსაც რუსეთის საოკუპაციო ძალების წინააღმდეგ გამოიყენებს.
„ვხსნით კიბერფრონტს! დაეხმარეთ უკრაინელებს ოკუპანტის რესურსების გატეხვის პროცესში! ჩვენ უკანასკნელ დღეებში მტრის გადაადგილებისა და მისი დივერსიულ-სადაზვერვო საქმიანობის შესახებ ბევრი სასარგებლო ინფორმაცია მოვიპოვეთ. თქვენი დახმარებით ბევრი ოკუპანტი განადგურდა! დღეს ტელეგრამ ჩატ-ბოტ @stop_russian_war_bot-ში გაჩნდა ახალი ფუნქცია, რომელიც კიბერფრონტზე ბრძოლას ემსახურება - თუკი რუსული ობიექტების კიბერთავდაცვაში რაიმე სუსტი წერტილი შეამჩნიეთ, აუცილებლად შეატყობინეთ ჩატ-ბოტს“, - ნათქვამია მიმართვაში.
განცხადებაში ასევე აღნიშნულია, რომ, აღნიშნული ხარვეზები შესაძლოა, ეხებოდეს ელფოსტას, ვებ-გვერდებს, ონლაინ-ბანკინგს, მართვის სისტემებს, კომპიუტერულ ქსელებს, სერტიფიცირების ცენტრებს, პირადი შეტყობინების აპლიკაციებს და სოციალურ ქსელებს.
როგორც უკრაინის უსაფრთხოების სამსახურის განცხადებაში არის ნათქვამი, უკრაინელი კიბერსპეციალისტები ჩატ-ბოტის მიერ შეგროვებულ ინფორმაციას ოკუპანტთან საბრძოლველად გამოიყენებენ.
