ჩვენ მხარს ვუჭერთ უკრაინას, მოვუწოდებთ მთელ ცივილიზებულ სამყაროს, გავერთიანდეთ უკრაინისთვის, მსოფლიომ იგივე შეცდომები არ უნდა დაუშვას, რაც 2008 წელს, როცა ოკუპანტს გაუვიდა, - ამის შესახებ საპარლამენტო უმრავლესობის წევრმა ირაკლი ზარქუამ ჟურნალისტებთან განაცხადა.
მისი თქმით, საქართველო ყველა ნაბიჯს საერთაშორისო პარტნიორებთან მჭიდრო კომუნიკაციით გადადგამს.
„აქედან გამომდინარე, მგონია, რომ სანქციები უნდა იყოს ადეკვატური, სწრაფი და საკმაოდ მტკივნეული რუსეთისთვის, ეს არის სწორი და ადეკვატური, ხოლო თუ ზედაპირული სანქციებით შემოვიფარგლეთ, ოკუპანტი უფრო გაძლიერდება და ხვალ, ზეგ უარესს ჩაიდენს. დღეს უკრაინა არის განსაცდელში და კიდევ ერთხელ მოვუწოდებ მთელ ცივილიზებულ სამყაროს, მსოფლიოს, რომ გავერთიანდეთ უკრაინას დასაცავად.
რაც შეეხება საქართველოს პოზიციას, ჩვენ ის ავსახეთ უკრაინის მხარდამჭერ რეზოლუციაში, სადაც ვთქვით, რომ უკრაინა არის არის სახელმწიფო, რომელიც იცავს თავის ტერიტორიას და მის სუვერენიტეტს ვინც შეეხება, უნდა იყოს დასჯილი. ეს სულისკვეთება იყო რეზოლუციაში. რაც შეეხება ჩვენს ნაბიჯებს, ჩვენი ყველა ნაბიჯი შეთანხმებულია დასავლელ პარტნიორებთან და როგორც მათთან ერთად, შეთანხმებულად ვმოქმედებდით, ასე გავაგრძელებთ. რაც შეეხება რიგგარეშე სხდომას, ამაზე იქნება განცხადება გაკეთებული, შევხედავთ სიტუაციას, როგორ იქნება, კიდევ ერთხელ გეუბნებით, ჩვენ მჭიდრო კომუნიკაციაში ვართ პარტნიორებთან და როგორც ჩაითვლება სწორად, სამართლიანად, იმ ფორმატში, რაც იქნება უკრაინისთვის მისაღები და ზოგადად, ამ გამოწვევისთვის, სწორედ ასე მოვიქცევით, ჩვენ ვართ თავისუფალ სამყაროსთან ერთად,"- განაცხადა ზარქუამ.
.jpg)