ყველაფერს თავის სახელი უნდა დავარქვათ - პუტინი არის აგრესორი, იბრძვის მშვიდობის წინააღმდეგ, თუ გვეგონება, უკრაინაში ომი იმიტომ მიმდინარეობს, რომ აბაშიძე-კარასინის ფორმატი არ ჰქონდათ, ყოველთვის ილუზიაში ვიქნებით, - ამის შესახებ ჟურნალისტებთან სტრატეგია აღმაშენებლის" დეპუტატმა პაატა მანჯგალაძემ განაცხადა.
მანჯგალაძის თქმით, საქართველო უნდა იდგეს იქ, სადაც თავისუფალი სამყარო დგას.
„ის, რაც უკრაინაში ხდება ადასტურებს, რომ რუსეთი და პუტინის რეჟიმი არის თავისუფალი სამყაროს მტერი. უკრაინელები იბრძვიან რუსული აგრესიის წინააღმდეგ და ქართველებმა უნდა ვიცოდეთ, რომ ისინი საქართველოსაც იცავენ დღეს. რუსეთი საქართველოშიც ახორციელებს ჰიბრიდულ ომს და ამას არქმევს სპეცოპერაციას ნაციონალისტების წინააღმდეგ, ეს სატყუარა არ უნდა დავიჯეროთ. პუტინისთვის მნიშვნელობა არ აქვს საბაბს, თავის იმპერიალისტურ ამბიციებზე უარს არ იტყვის და აუცილებელია, ყველაფერს დავარქვათ თავის სახელი, იმედს ვიტოვებ საქართველოს მთავრობა გამოვა ჩირგვებში ჯდომის პოზიციიდან და ცივილიზებულ სამყაროსთან დადგება. არავინ ამბობს, რომ რამე ზედმეტი საბაბი უნდა მისცეს საქართველომ რუსეთს პროვოცირებისთვის, არც უკრაინელებს მიუციათ, მაგრამ აუცილებლად უნდა ვიდგეთ იქ, სადაც დგას ცივილიზებული სამყარო, რადგან უკრაინაში პუტინი ებრძვის ცივილიზებულ სამყაროს. გუშინდელი განცხადება, რაც ღარიბაშვილმა გააკეთა, რომ თითქოს უკრაინამ რაიმე დააკლო მშვიდობის მცდელობას - დასავლეთმა უკრაინას იარაღი არ უნდა მისცეს და სამშვიდობო პროცესით მოგვარდესო - ეს მძიმე განცხადებაა, აბა რა უნდა ქნას უკრაინამ, როცა იარაღის გარდა, სხვა დაცვის საშუალება არ აქვს?!"- განაცხადა მანჯგალაძემ.
