პრემიერის თითოეული ფრაზის ანალიზი დროის კარგვაა, შედეგი გვაქვს ის, რომ პანდემიის მართვა არის კატასტროფულ მდგომარეობაში, - ამის შესახებ “ლელოს” გენერალურმა მდივანმა ბადრი ჯაფარიძემ ჟურნალისტებს განუცხადა, რითაც გამოეხმაურა ვაქცინაციასთან დაკავშირებით პრემიერ-მინისტრის განცხადებას.
მისივე თქმით, პანდემიის მართვა ჩამოიშალა.
“მიმაჩნია, რომ პრემიერის საქმიანობა კატასტროფულია, მათ შორის პანდემიის მართვის კუთხით, აქედან გამომდინარე მისი თითოეული განცხადების შეფასება ჩემთვის მნიშვნელოვანი არ არის. პანდემიის მართვის კუთხით ქვეყანაში კატასტროფული ვითარებაა. თითოეული ფრაზის ანალიზი დროის კარგვაა. შედეგი გვაქვს ის, რომ პანდემიის მართვა არის კატასტროფულ მდგომარეობაში. ქვეყანა სრულად დაიკეტა, როდესაც ამის საჭიროება არ არსებობდა, შემდეგ გაიხსნა, როდესაც რისკები ბევრად დიდი იყო. ასე რომ, სრულიად არაპროფესიონალური, კატასტროფული მართვაა და შესაბამისად, მივიღეთ შედეგი, რაც გვაქვს”,- განაცხადა ბადრი ჯაფარიძემ.
როგორც ჯაფარიძემ აღნიშნა, კონცენტრირება უნდა გაკეთდეს იმაზე, რომ ვაქცინაციის შემდგომ სიკვდილიანობის შემთხვევა ნულის ტოლია.
“მეც შემიძლია ეს გითხრათ, რომ ვაქცინა ინფიცირების წინააღმდეგ გარანტიას არ იძლევა. ეს ასეა, გააჩნია რა აქცენტებს სვამ. თავად ვაქცინის მწარმოებლებიც ამბობენ რომ არის 85%-იანი, 80%-იანი და 75%-იანი დაცვა. ასე რომ, არ არის საჭირო იმაზე კონცენტრირება, რომ 100%-იან გარანტიას არ იძლევა, კონცენტრირება უნდა გავაკეთოთ იმაზე, რომ ვაქცინაციის შემდგომ სიკვდილიანობის შემთხვევა ნულის ტოლია”, - განაცხადა ბადრი ჯაფარიძემ.
ცნობისთვის, როგორც საქართველოს პრემიერ-მინისტრმა ირაკლი ღარიბაშვილმა მთავრობის დღევანდელ სხდომაზე განაცხადა, „სხვა შტამების შემთხვევაში სხვა სურათი იყო, მაგრამ „ომიკრონის“ დროს, უმეტეს შემთხვევაში ვაქცინა არ მუშაობს”. როგორც მან აღნიშნა, დაიწყო უსაფუძვლო არაარგუმენტირებული სპეკულირება იმის თაობაზე, თუ რატომ მოხდა კოვიდპასპორტის გაუქმება.
„ვაქცინირებულ პირს ჩვეულებრივ ემართება „ომიკრონი“. მაგალითად, მე ვარ ერთი მაგალითი - მქონდა სხვა შტამი გასულ წელს, ორჯერ ვიყავი აცრილი „ფაიზერის“ ვაქცინით, მაგრამ მაინც დამემართა „ომიკრონი”, - განაცხადა ღარიბაშვილმა.
