საქართველოს ჯანდაცვის სამინისტროსთან სოციალური მომსახურების სააგენტოს გაფიცულმა თანამშრომლებმა აქცია გამართეს. აქციის მონაწილეების განცხადებით, ისინი ღირსეულ ანაზღაურებას მოითხოვენ და სამინისტროს მხრიდან ხელფასების 60%-ით გაზრდა არასაკმარისია. მათი მთავარი მოთხოვნა ჯანდაცვის მინისტრთან შეხვედრაა.
აქციის მონაწილეებს ხელში ეჭირათ ბანერები "ვითხოვთ ღირსეულ ხელფასს”, ჩვენ არ ვართ მონები”, და სხვა.
როგორც აქციის ერთ-ერთმა ორგანიზატორმა დავით უმსარაშვილმა განაცხადა, მათი მოთხოვნები გარდა ხელფასის გაზრდისა ასევე შეეხებოდა გზის ხარჯის ანაზღაურებას, დაზღვევის პაკეტის შემუშავებას და ხელშეკრულების ვადის განსაზღვრას, რაც ამ დრომდე დაკმაყოფილებული არ არის.
„ჩვენ ვაპროტესტებთ იმ ღირსების შემლახავ ანაზღაურებას, რომელიც საარსებოდაც კი საკმარისი არ არის. იმ შემთხვევაშიც კი თუ 60%-ით გაიზარდა ამ ადამიანების ხელფასი, მაინც არ არის მისაღები გამომდინარე იქიდან, რომ ხელფასი ძალიან მწირი იყო. სამინისტროს უნდა დაგვანახოს თითქოს ამ პროტესტის გარეშეც აპირებდნენ ხელფასების მატებას, რაც არასწორია. ხელფასების მომატება გამოიწვია სწორედ ამ ბრძოლამ, რომელიც დასაქმებულებმა აწარმოეს, თუმცა ბრძოლა გრძელდება მანამ, ვიდრე ყველა მოთხოვნა არ დაკმაყოფილდება.
პირველ ყოვლისა ვითხოვთ ჯანდაცვის მინისტრთან შეხვედრას, სხვა მოთხოვნებია ყოველწლიურად ინფლაციის დონის შესაბამისად მოხდეს ხელფასის გადახედვა, ასევე ანაზღაურდეს გზის ხარჯი, რომელზეც განცხადებაში არაფერი არ არის ნათქვამი, ასევე ჩვენი მოთხოვნაა დაზღვევა, ხელშეკრულების ვადის განსაზღვრა და ა.შ. ამიტომ, თუ ვინმეს სურს იმის თქმა, რომ ჩვენი მოთხოვნები დაკმაყოფილდა, ეს არ არის სწორი შეფასება”, - აღნიშნა დავით უმსარაშვილმა.
(ipn)
