დაავადებათა კონტროლის და ჯანდაცვის სამინისტროს პოზიცია კვლავაც არის უცვლელი, რომ სკოლებს მაქსიმალურად უნდა ჰქონდეთ იმის საშუალება, რომ საკლასო გარემოში გააგრძელონ ფუნქციონირება, - ამის შესახებ ჯანდაცვის მინისტრის მოადგილემ, თამარ გაბუნიამ საკოორდინაციო საბჭოს სხდომის დასრულების შემდეგ ჟურნალისტებთან საუბრისას განაცხადა.
როგორც გაბუნიამ განმარტა, ამ კუთხით სკოლების მზაობა საკმაოდ მაღალია, რადგან მათ უკვე გაიარეს პანდემიური ტალღის არაერთი ეტაპი.
„ისინი ადაპტირებული არიან იმ პროტოკოლზე, რომელიც საჭიროა ინფიცირების შემთხვევების გამოვლენის შემთხვევაში. სკოლების უმრავლესობას ძალიან მარტივად შეუძლია გამოიყენოს მოქნილი მექანიზმი დისტანციური სწავლების ამოქმედებისთვისაც. ბავშვებს და მშობლებს სთავაზობენ, რომ მათ აირჩიონ, რომელი ურჩევნიათ და ამ კუთხით ეს ქმნის მნიშვნელოვან გარანტიებს. ასევე მნიშვნელოვანია ვაქცინაციის პროცესი - სკოლებში 70%-ს აღემატება ვაქცინირებული პერსონალის რაოდენობა და ამ მიმართულებითაც მუშაობა გრძელდება“, - განაცხადა თამარ გაბუნიამ.
(ipn)
