დღეს რომ პრეზიდენტი იყოს, შეიწყალებდა თუ არა გიორგი მარგველაშვილი მიხეილ სააკაშვილს - საქართველოს მეოთხე პრეზიდენტმა აღნიშნულ შეკითხვას "მთავარი არხის" ეთერში უპასუხა.
როგორც მარგველაშვილმა განმარტა, პრეზიდენტი არ უნდა იყოს მისთვის და მისი მხარდამჭერებისთვის დამამცირებელ ვითარებაში.
"ჩემი მიზანი იქნებოდა მისთვის, პრეზიდენტისთვის, მისი ამ პირობების შემსუბუქება... მე არ მინდა რომ ამაში ჩავერიო [შეწყალების საკითხი] იმიტომ, რომ არ მინდა მოქმედი პრეზიდენტის კომპეტენციაში შევიჭრა და პოზიცია დავაფიქსირო... მე მაშინაც მქონდა პოზიცია, რომ სააკაშვილს ქართული საზოგადოების წინაშე იმ კითხვებზე უნდა გაეცა პასუხი, პიჯაკებზე კი არა, ყველა კითხვაზე პასუხი გაეცა, და დღესაც მგონია, რომ მისი პრობლემა არა ის არის რომ სააკაშვილი ასე ვთქვათ პასუხს აგებს, პრობლემაა ის რომ ის, ქვეყნის მესამე პრეზიდენტი, ორჯერ არჩეული, იმ ვითარებაშია, რომელიც მისთვის დამამცირებელი და დამამძიმებელია... მე მიმაჩნია, რომ პრეზიდენტი უნდა იყოს იმ ვითარებაში, რომელიც არ იქნება მისთვის და მისი მხარდამჭერებისთვის დამამცირებელი", - ამბობს მარგველაშვილი.
