ქართული ოცნების“ წევრი შალვა პაპუაშვილი განმარტავს, რატომ არის საჭირო ცესკოს თავმჯდომარისა და ე.წ. პროფესიული წევრების არჩევის წესის ცვლილება.
როგორც პაპუაშვილმა ჟურნალისტებს განუცხადა, გამომდინარე იქიდან, რომ ცესკოს მოქმედ თავმჯდომარეს და პროფესული წესით არჩეულ ორ წევრს უფლებამოსილების ვადა თებერვალში ეწურება, მათი არჩევის საკითხი კვლავ დღის წესრიგში დადგება. პაპუაშვილის თქმით, მაისში შუალედური არჩევნები უნდა ჩატარდეს და თუკი ცესკოს თავმჯდომარისა და წევრების არჩევა მოქმედი პროცედურით მოხდება, ამას 4 თვე დასჭირდება და მაისამდე ცესკოს სრულად დაკომპლექტება ვერ მოხდება.
„ვნახეთ, რომ იდეა, რაც კვალიფიციურ უმრავლესობის წესში იყო ჩადებული, რომ ოპოზიციასთან ერთად არჩეულიყო და კონსესუსით მიღებული გადაწყვეტყილება ყოფილიყო, ვერ შედგა იმიტომ, რომ ოპოზიციამ ამ პროცესს საბოტაჟი გამოუცხადა და კენჭსყრაში მონაწილეობა არ მიიღო. ჩვენ მაშინაც გვქონდა გარდამავალი დებულებები, სადაც იყო შემოკლებული ვადები. ვინაიდან თავმჯდომარე და წევრები 6 თვის ვადით იყვნენ არჩეულები, ახლაც დღის წესრიგში დგას ხელახლა არჩევის საკითხი, რადგან მათ ვადა თებერვალში გასდით. ასევე, ვიცით, რომ მაისში უნდა ჩატარდეს შუალედური არჩევნები რუსთავში მაჟორიტარი წევრის და ასევე, ჩასატარებელი იქნება შუალედური არჩევნები გამოკლებული წევრების. შესაბამისად, აქაც დგას ერთი მხრივ ის საკითხი, რომ თუკი თავდაპირველ პროცედურას გავყვებით, ამას სჭირდება 4 თვე და მაისში არჩევნების ჩატარება ისე მოგვიწევს, რომ ცესკო სრულად დაკომპლექტებული არ იქნება. მეორე მხრივ, 4-ჯერ კენძისყრა და შუალედები არაფერს იძლევა, გარდა პროცესის გაჭიანურებისა. ვინაიდან, თუ ოპოზიცია დესტრუქციულადაა განწყობილი, 4 კენჭისყრა იქნება თუ 5, კონსესუსისკენ მაინც არ მოდიან. ახალი წესით, არჩევის პირველი მცდელობა იქნება 2/3-ით, მეორე კი უბრალო უმრავლესობით. თუმცა დარჩება წესი, რომ თუ 2/3-ით არჩევა არ მოხდა, ამ შემთხვევაში თავმჯდომარე და წევრები 6 თვით დაინიშნებიან“,- განაცხადა შალვა პაპუაშვილმა.
ცნობისთვის, ცესკოს თავმჯდომარისა და ე.წ. პროფესიული წევრების არჩევის წესი იცვლება. რამდენიმე თვის წინ ამ მიმართულებით კანონმდებლობაში განხორციელებულ ცვლილებებში ცვლილება შევა, რომელიც უკვე მომზადებულია. პროექტით, თუ ცესკოს წევრის/ცესკოს თავმჯდომარის პარლამენტის სრული შემადგენლობის არანაკლებ ორი მესამედით ასარჩევად გამართული კენჭისყრის შედეგად ყველა ვაკანსია არ შეივსო, ყველა იმ დარჩენილ კანდიდატს, რომელმაც ამ კენჭისყრისას პარლამენტის სრული შემადგენლობის უმრავლესობის მხარდაჭერა მოიპოვა, ხელახლა ეყრება კენჭი.
İpn.ge
