სრულიად საქართველოს პატრიარქი, ილია მეორე, საქართველოს მესამე პრეზიდენტს, მიხეილ სააკაშვილს სთხოვს, შიმშილობა შეწყვიტოს, რადგან ეს არაქრისტიანული ქმედებაა. აღნიშნული თხოვნა მიხეილ სააკაშვილს პატრიარქის მდივანმა გადასცა, რომელიც ცოტა ხნის წინ მასთან სასჯელაღსრულების დაწესებულებაში იმყოფებოდა.
აღნიშნულის შესახებ ინფორმაციას საპატრიარქო ავრცელებს.
„უწმინდესისა და უნეტარესის, სრულიად საქართველოს კათოლიკოს-პატრიარქ ილია II-ის ლოცვა-კურთხევით, კათოლიკოს-პატრიარქის მდივანმა, დეკანოზმა მიქაელ ბოტკოველმა რუსთავის პენიტენციურ დაწესებულებაში საქართველოს მესამე პრეზიდენტი მიხეილ სააკაშვილი მოინახულა.
დეკანოზმა მიქაელ ბოტკოველმა ბატონ მიხეილ სააკაშვილს გადასცა უწმინდესის დალოცვა, მოკითხვა და როგორც ყველა მსგავსი შემთხვევისას, ამჯერადაც ეკლესიის სახელით სთხოვა, შეეწყვიტა შიმშილობა, რადგან ეს არის არაქრისტიანული ქმედება“, - ნათქვამია საპატრიარქოს მიერ გავრცელებულ ინფორმაციაში.
(report)
