კოვიდინფიცირებული პაციენტების ჯანმრთელობის მდგომარეობა, რომლებიც ამჟამად დიღმის საველე ჰოსპიტალში მკურნალობენ, საშუალო სიმძიმისაა, - ამის შესახებ საველე ჰოსპიტლის კოორდინატორმა, რევაზ კუჭუხიძემ „ქრონიკას“ განუცხადა.
მისივე თქმით, საველე ჰოსპიტალში ამჟამად 19 პაციენტი იმყოფება.
„პაციენტების მდგომარეობა არის საშუალო სიმძიმის, საველე ჰოსპიტალში მოთავსებული პაციენტების უმეტესობას დელტა შტამი უდასტურდებათ. რამდენიმეს მდგომარეობა სტაბილურია და ამ ეტაპზე მათ ჟანგბადი არ სჭირდებათ“, - განაცხადა საველე ჰოსპიტლის კოორდინატორმა.
დიღმის საველე ჰოსპიტალში პაციენტების მიღება 20 აგვისტოს დაიწყო.
ამ დროისთვის საქართველოში კორონავირუსის 510941 შემთხვევაა დადასტურებული. მათ შორის გამოჯანმრთელდა 442956, გარდაიცვალა 6723 პაციენტი.
ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.
საქართველოში „ასტრაზენეკათი“ ვაქცინაცია 2021 წლის 15 მარტიდან დაიწყო, „ფაიზერით“ კი 30 მარტიდან. 3 აპრილს ქვეყანამ „სინოფარმის“ ვაქცინის 100 ათასი დოზა მიიღო. ამ ვაქცინის გამოყენება 4 მაისიდან დაიწყო, „სინოვაკით“ იმუნიზაცია კი 24 მაისიდან.
ტვ იმედი
