დღეს, რაც ნამდვილად ზუსტად შემიძლია ვთქვა, ორსულებში „ფაიზერით“ ვაქცინაცია არის სრულიად უსაფრთხო, - ამის შესახებ ჯანდაცვის მინისტრის მოადგილემ, თამარ გაბუნიამ ჟურნალისტებს განუცხადა. „რაც შეიძლება სწრაფად, ყველა ორსული ვაქცინაციაში უნდა ჩაერთოს“, - თქვა გაბუნიამ.
მან ასევე აღნიშნა, რომ ბოლო დროს ორსულების გარდაცვალების რამდენიმე შემთხვევა დაფიქსირდა, რაც უკიდურესად საგანგაშოა.
ამ დროისთვის საქართველოში კორონავირუსის 506 040 შემთხვევაა დადასტურებული. მათ შორის გამოჯანმრთელდა 440 370, გარდაიცვალა 6 649 პაციენტი.
ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.
საქართველოში „ასტრაზენეკათი“ ვაქცინაცია 2021 წლის 15 მარტიდან დაიწყო, „ფაიზერით“ კი 30 მარტიდან. 3 აპრილს ქვეყანამ „სინოფარმის“ ვაქცინის 100 ათასი დოზა მიიღო. ამ ვაქცინის გამოყენება 4 მაისიდან დაიწყო, „სინოვაკით“ იმუნიზაცია კი 24 მაისიდან.
