როგორც ეკატერინე ტიკარაძემ აჭარაში ვიზიტისას აღნიშნა, მუდმივი მონიტორინგით შეეცდებიან, პაციენტებს პრობლემა არ შეექმნათ.
რაც შეეხება აჭარას, მინისტრის თქმით, რეგიონში ეპიდემიოლოგიური ფონი არის მძიმე, თუმცა მართვადი.
ეკატერინე ტიკარაძემ საზოგადოებას ვაქცინაციისკენ მოუწოდა.
"მთავარია გავიკეთოთ ნებისმიერი ვაქცინა, მივიღოთ დროული გადაწყვეტილება და ჩვენი მხრიდან, რა თქმა უნდა, ხელშეწყობა იქნება, რომ საქართველოს ნებისმიერ წერტილში მოქალაქეს ჰქონდეს ხელმისაწვდომობა და არჩევანი ყველა იმ ვაქცინაზე, რომელიც დღეს ქვეყანაში არსებობს და დღეს ქვეყანაში ნამდვილად გვაქვს ფართო ხელმისაწვდომობა ყველა ვაქცინაზე და ყველა ვაქცინის რაოდენობა არის საკმარისი.
საქართველოს მასშტაბით გვაქვს კრიტიკული, სერიოზული პრობლემები საწოლფონდთან დაკავშირებით, ეს პრობლემა გარკვეული პერიოდის განმავლობაში ალბათ შენარჩუნდება, თუმცა ჩვენი აქტიური ჩართულობით და მუდმივი მონიტორინგით შევეცდებით, რომ პაციენტებს პრობლემა არ შეექმნათ,"- განაცხადა ეკატერინე ტიკარაძემ.
ცნობისთვის, ბოლო 24 საათში საქართველოში კორონავირუსის 5359 ახალი შემთხვევა დადასტურდა. ვირუსისგან განიკურნა 2726 ადამიანი.
გასულ დღე-ღამეში გარდაიცვალა კიდევ 42 პაციენტი.
