ირაკლი ღარიბაშვილის განმარტებით, მორიგ ე.წ „ლოკდაუნს“ ნეგატიური ეფექტი ექნება ეკონომიკაზე, შესაბამისად საკოორდინაციო საბჭო აქამდე ნაცნობ რეგულაციებს აღადგენს.
პრემიერ-მინისტრის განცხადებით, შეზღუდვები შესაძლოა ხალხმრავალ შეკრებებს შეეხოს. რთულ ეპიდვითარებაზე ისაუბრა ჯანდაცვის მინისტმაც. ეკატერინე ტიკარაძემ მოქალაქეებს რეგულაციების დაცვისკენ მოუწოდა.
ამ დროისთვის საქართველოში კორონავირუსის 447 913 შემთხვევაა დადასტურებული. მათ შორის გამოჯანმრთელდა 400 616, გარდაიცვალა 6 084 პაციენტი.
ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.
საქართველოში „ასტრაზენეკათი“ ვაქცინაცია 2021 წლის 15 მარტიდან დაიწყო, „ფაიზერით“ კი 30 მარტიდან. 3 აპრილს ქვეყანამ „სინოფარმის“ ვაქცინის 100 ათასი დოზა მიიღო. ამ ვაქცინის გამოყენება 4 მაისიდან დაიწყო, „სინოვაკით“ იმუნიზაცია კი 24 მაისიდან.
