ისრაელის პარლამენტის იურიდიულ და საკონსტიტუციო საკითხთა კომიტეტმა „წითელი ზონის“ ქვეყნების სიის გაფართოებისთვის მთავრობისგან დამატებითი დასაბუთება მოითხოვა. ამის შესახებ ინფორმაციას ადგილობრივი მედია ავრცელებს.
ახალი დადგენილებით, ისრაელის მოქალაქეებისთვის 30 ივლისიდან საქართველოში, დიდ ბრიტანეთში, კვიპროსსა და თურქეთში გამგზავრებაზე აკრძალვა უნდა დაწესებულიყო, თუმცა პარლამენტის გადაწყვეტილებით, აღნიშნულ საკითხზე კენჭისყრა გადაიდო.
საკონსტიტუციო კომიტეტი ამ საკითხებზე სრულყოფილი განახლებების მიღებას ელოდება, სანამ სიის გაფართოებას მხარს დაუჭერს.
ამ დროისთვის, ქვეყნების ჩამონათვალში, რომლებიც ისრაელის მიერ ინფექციის გავრცელების მაღალი რისკის მქონედ მიიჩნევიან, არგენტინა, ბელარუსი, ბრაზილია, ინდოეთი, ყირგიზეთი, მექსიკა, რუსეთი, ესპანეთი, სამხრეთ აფრიკა და უზბეკეთი არიან.
(pia.ge)
