"მთავარი არხის" დირექტორს ნიკა გვარამიას სიცოცხლის მოსპობით ემუქრებიან. ამის შესახებ მან სოციალური ქსელით ინფორმაცია გაავრცელა.
როგორც გვარამიამ განაცხადა, მის მიმართ მუქარის შემცველი გზავნილები "ალტ-ინფოს" დახურულ ჩატში მოიპოვება.
პოსტზე გვარამიამ შინაგან საქმეთა სამინისტრო მონიშნა. მის მიმართ განხორციელებული მუქარის სასწრაფო გამოძიება მოითხოვა კოალიციამ მედიის განვითარებისთვის.
"ცნობილი გახდა, რომ “მთავარი არხის” დირექტორს ნიკა გვარამიას ძალადობრივ ჯგუფის წევრები ალტ - ინფოს ფეისბუკ არხის დაბლოკვის გამო სიცოცხლის მოსპობით ემუქრებიან.
ბოლო პერიოდში საქართველოში მედიის უფლებების დარღვევის ფაქტებმა კრიტიკულ ზღვარს მიაღწია. 2021 წლის 5 - 6 ივლისს მედიაზე მასშტაბური თავდასხმა მოხდა. თავდასხმის შედეგად დაზიანდა 10 ზე მეტი მედიის 53 წარმომადგენელი. სამსახურებრივი მოვალეობის დროს მიღებული დაზიანებების შემდეგ გარდაიცვალა TV პირველის ოპერატორი ალექსანდრე (ლექსო) ლაშქარავა.
კონკრეტული მედიასაშუალებების პრემიერის მონაწილეობით საჯარო ღონისძიებაზე გაშუქებაზე უკანონო შეზღუდვა ლახავს როგორც მედიის უფლებას განახორციელონ საკუთარი პროფესიული მოვალეობა, ასევე საზოგადოებას ართმევს შესაძლებლობას ინფორმაცია მიიღონ საჯარო ინტერესის შემცველი ღონისძიების შესახებ.", - ნათქვამია კოალიციის მიერ გავრცელებულ განცხადებაში.
(ipn)
