„ქვეყანას ახალი გზა, ახალი პერსპექტივა სჭირდება. ჩვენ უნდა გამოვიდეთ ამ ჩაკეტილი წრიდან, რომელზეც, სამწუხაროდ, ბოლო წლების განმავლობაში დავრბივართ და რომელმაც მიგვიყვანა სიძულვილამდე, რადიკალიზაციამდე, ერთმანეთის ცემა-ტყეპამდე, ჭორაობამდე, გინებამდე და საბოლოოდ ვიღებთ იმას, რასაც ვიღებთ“, - აცხადებს პარტია ,,საქართველოსთვის“ თავჯდომარე გიორგი გახარია. მისივე შეფასებით, ეს ყველაფერი ცალკე აღებული ჩვენი მოქალაქეების ტრაგედიებში გადაიზრდება, ასე ხდება, როცა სახელმწიფო თავის ფუნქციას ვერ ასრულებს.
გახარიამ დღეს პარტია ,,საქართველოსთვის“ ახალი ოფისი მცხეთაში გახსნა და მედიის შეკითხვებსაც იქ უპასუხა.
„იმ ქაოსის მიუხედავად, რაც ახლა ქვეყანაში ხდება და იმ ცირკის მიუხედავად, რაც პარლამენტში ხდებოდა, ჩვენ, ჩვენს გეგმას მივუყვებით. ჩვენ ამ გზიდან არ გადავუხვევთ, რადგან ვთვლით, რომ ქვეყნის მომავლისთვის უაღრესად მნიშვნელოვანია და ეს არის ძირითადი წინაპირობა იმისთვის, რომ ქვეყანაში რეალობა შეიცვალოს - პარტიული ოფისების გახსნა, არჩევნებში მონაწილეობა, ახალი თაობის ახალგაზრდა პოლიტიკოსები, რომლებმაც ამ ქვეყნის მომავალი უნდა ჩაიბარონ“, - აცხადებს გიორგი გახარია.
(ipn)
