მარნეულის ლიტ-ფესტივალი წარმოადგენს ლიტერატურულ ღონისძიებას, რომლის საპილოტე ვერსია წელს პირველად მარნეულში ჩატარდება. ფესტივალი ადამიანის განვითარების და კულტურის საერთაშორისო სკოლის, მარნეულის კულტურის ცენტრის და მარნეულის მუნიციპალიტეტის საჯარო ბიბლიოთეკის ინიციატივითა და ორგანიზებით იმართება.
აღსანიშნავია, რომ ფესტივალი ინოვაციური მეთოდით, მრგავლი მაგიდის პრინციპით გაიმართება. ღონისძიებაში მონაწილე საზოგადოებას ადგილობრივი და მოწვეული მწერლები, პუბლიცისტები, პოეტები, გამომცემლები უმასპინძლებენ და გაესაუბრებიან მათთვის საინტერესო და მნიშვნელოვან თემებზე. სპეციალურად ფესტივალის ფარგლებში გამომცემლობა „დიოგენე“ გამართავს წიგნის გამოფენა-გაყიდვას, ადგილზე მისულ მოქალაქეს საშუალება ექნება წიგნები შეღავათიან ფასებში შეიძინოს და მუნიციპალიტეტში, ადგილზე გაეცნოს თანამედროვე საგამომცემლო სექტორის საქმიანობას. ფესტივალზე მარნეულის საჯარო ბიბლიოთეკა და მარნეულის „ამერიკული კუთხე“ წარმოდგენილი იქნება საკუთარი სტენდით.
ღონისძიების მასპინძლები იქნებიან: მწერალი და დრამატურგი - ბასა ჯანიკაშვილი; საბავშვო მწერალი - ლელა ცუცქირიძე; მწერალი - ქამურანი და პოეტი - კოკი ხარშილაძე.
სპეციალური მოწვევით ფესტივალში მონაწილეობას მიიღებს მსახიობი - ქეთი ჩხეიძე.
ფესტივალის მიზანს ადგილობრივ მოსახლეობაში წიგნის კითხვის პოპულარიზაცია, მუნიციპალიტეტში ადგილობრივი ლიტერატორების ცნობადობის ამაღლება/წახალისება და რეგიონში საგამომცემლო სექტორის განვითარების ხელშეწყობა წარმოადგენს.
