პანდემიის პერიოდში ზაფხულის ტურისტული სეზონი იქნება იმაზე უკეთესი, ვიდრე ჩვენ ველოდებოდით, მაგრამ ვერ იქნება სრულფასოვანი. შეზღუდვების მინიმალური რაოდენობა რჩება და მათ შორის, სამწუხაროდ, ეს შეზღუდვა ვრცელდება ღამის კლუბებზე, - ამის შესახებ ეკონომიკის მინისტრმა, ნათია თურნავამ დღეს, საკოორდინაციო საბჭოს სხდომის დასრულების შემდეგ, მედიისთვის გამართულ ბრიფინგზე განაცხადა.
„ჩვენი ეპიდემიოლოგების მიერ ღამის კლუბები მიჩნეულია ერთ-ერთ რისკის მატარებელ ჯგუფად, თუმცა უნდა განვიხილოთ ღამის კლუბებთან ერთად დახმარების რა შესაძლებლობები გვაქვს. პანდემიისგან ეს ინდუსტრია დაზარალებულია, როგორც ყველა სხვა, თუმცა ამ სეგმენტისთვის შეზღუდვა დიდხანს გაგრძელდა. ამიტომ სამინისტროსთან და თბილისის მერიასთან ერთად, მზად ვართ, ამ სეგმენტის დახმარების საკითხი განვიხილოთ“, - აღნიშნა თურნავამ.
(imedi)
