ოპოზიციონერი დეპუტატი ანა ნაცვლიშვილი „ამნისტიის შესახებ" პროექტის განხილვის გადადებას ითხოვს. აღნიშნული მოთხოვნა ნაცვლიშვილმა პარლამენტის ადამიანის უფლებათა დაცვის კომიტეტის სხდომაზე დასვა და როგორც განმარტა, პარლამენტში წარდგენილი საკანონმდებლო ინიციატივა ადამიანის უფლებათა დაცვის ევროპულ კონვენციას არღვევს. ნაცვლიშვილის შეფასებით, თუკი პარლამენტის ადამიანის უფლებათა დაცვის კომიტეტი ამნისტიის პროექტს მხარს დაუჭერს, ეს იმას ნიშნავს, რომ კომიტეტი საკუთარ ფუნქციას აუქმებს.
ამ კონტექსტში ნაცვლიშვილმა „ამნისტიის შესახებ" უმრავლესობის პროექტი გააკრიტიკა და როგორც განაცხადა, მმართველი გუნდი 19-20 ივნისის მოვლენებზე ამნისტიის მიღებას ისე აპირებს, რომ არც კი ეძიება, თუ რა მოხდა.
ნაცვლიშვილმა კომიტეტის წევრებს მიმართა, კანონპროექტის განხილვამდე და მის მხარდაჭერამდე იმ ორგანიზაციების მოსმენა მოხდეს, რომელთაც დოკუმენტალურად შეისწავლეს, რა მოხდა 19-20 ივნისს. ასევე, კომიტეტმა მოუსმინოს გენერალურ პროკურორს, სახალხო დამცველს და თავად დაზარალებულებს.
„წინააღმდეგ შემთხვევაში, წარმოდგენილი ამნისტიის კანონპროექტი არის მწვანე შუქის ანთება, რომ ხვალ ადამიანი აქციაზე გავა, ესვრიან", - განაცხადა ანა ნაცვლიშვილმა.
ანა ნაცვლიშვილის მოთხოვნასა და შეფასებას „ქართული ოცნების" დეპუტატების კრიტიკა მოჰყვა. უმრავლესობის წარმომადგენლებმა ოპოზიციონერ კოლეგას მიმართეს შეკითხვით, იცოდა თუ არა, შარლ მიშელის დოკუმენტის სახით, რას მოაწერა ხელი პარტია „ლელომ".
İpn.ge
