„ერთიანი საქართველოს“ ლიდერი, ნინო ბურჯანაძე აცხადებს, რომ დედაქალაქსა და რეგიონებში აქციებს გეგმავენ. მისივე განცხადებით, მათ მოლაპარაკებების „ნორმალურად წარმართვა“ სურთ.
„ვგეგმავთ საპროტესტო აქციებს, როგორც რეგიონებში, ისე თბილისის მასშტაბით, თუმცა საპროტესტო აქციები არ არის ჩვენი თვითმიზანი. თუ ხელისუფლება პოლიტიკურ დევნას შეწყვეტს და დანიშნავს ვადამდელ არჩევნებს, შეიძლება, ასეთ შემთხვევაში, აქციებიც შეწყდეს. თუ მოლაპარაკებები წარიმართება ნორმალურად, არც კარავი იქნება და არც აქციები“ - აცხადებს ნინო ბურჯანაძე.
პოლიტიკური გაერთიანება „ლელოს“ ერთ-ერთი დამფუძნებელი, ბადრი ჯაფარიძე ამბობს, რომ მოლაპარაკებების გარეშე, ქვეყანაში პროცესები უმართავი გახდება.
„თუ მოლაპარაკებების პროცესი დაიწყება, რა თქმა უნდა, საპროტესტო აქციების გადადება შესაძლებელია. ჩვენი ამოცანა, მიზანი, საპროტესტო აქციები კი არა, არამედ - პოლიტიკური კრიზისის განმუხტვაა. წინააღმდეგ შემთხვევაში, ჩვენ ისეთი პროცესები შეიძლება ვნახოთ, რომლის კონტროლიც შეუძლებელი იქნება და ჩვენი ქვეყანა, ჩვენი მოქალაქეები მიიღებენ ძალიან დიდ ზიანს. ჩვენი ამოცანაა შეთანხმების მიღწევა ორივე მიმართულებით: პირველი - კრიზისის განმუხტვა დაუყოვნებლივ, რომელიც დაკავშირებულია მელიას დაპატიმრებასთან მიმართებით მიღებულ გადაწყვეტილებასთან და მეორე - პოლიტიკური კრიზისი, რომელიც წარმოიშვა 31 ოქტომბრის შემდეგ“ - აცხადებს ბადრი ჯაფარიძე.
(imedi)
