ალბათ, იყო ჩემი პირადი შეცდომაც, რომ მე ზოგიერთ საკითხთან დაკავშირებით უფრო მტკიცე პოზიცია არ დავიჭირე, - ამის შესახებ დაავადებათა კონტროლის ეროვნული ცენტრის ხელმძღვანელმა ამირან გამყრელიძემ ტელეკომპანია "პალიტრანიუსის" გადაცემა "პოლიტ-ქალაქში" განაცხადა, სადაც მან კორონავირუსის გავრცელების კონტექსში მიზეზებსა და შეცდომებზე ისაუბრა.
გამყრელიძემ ასევე განაცხადა, რომ კორონავირუსის მსგავსი მასშტაბით გავრცელების ერთ-ერთი მიზეზია, რომ ზაფხულში ქართველებმა დავიჯერეთ - "ძალიან მაგრები, ყველაზე მაგრები ვართ!"
როგორც გამყრელიძე ამბობს, რომ ბათუმს, თავის დროზე „ვერ მოუარეს“.
მანვე აღნიშნა, რომ ადამიანების 200 ლარზე ცხოვრება და მძიმე სოციალური ყოფის ესმის, მაგრამ ამოსავალი უფლებათა შორის, სიცოცხლე და ჯანმრთელობაა.
"გუშინ ჩემზე დაუწერიათ, აბა 200 ლარზე იცხოვროსო და მესმის ეს ძალიან სერიოზული თემებია, ამ ყველაფერმა ადამიანების სოციალურ მდგომარეობაზე სერიოზულად იმოქმედა, მაგრამ ამოსავალი უფლებათა შორის დამეთანხმებით, სიცოცხლისა და ჯანმრთელობის უფლებაა. ეს ყველაფერი კეთდება იმისთვის, რომ ნაკლები ადამიანი დაავადდეს და ნაკლები სიკვდილიანობა გვქონდეს. ზოგიერთი საკითხი, იგივე სოციალური საკითხი ამას ეწირება. დანის პირზე სიარული საკმაოდ რთულია, ამიტომ მიდის ამდენი დისკუსია, განხილვა, შეთანხმება და როგორც წესი, კონსენსუსი. რა თქმა უნდა, საკრიტიკო იქნება და უნდა იყოს კიდეც. როგორც სხვა რესპირაციული ინფექციები, როცა ზაფხულში იკლებს და არ არის, დიდი იმედი იყო, რომ ესეც ზაფხულში გაქრებოდა, მაგრამ არ გაქრა, ის შესუსტდა. თუმცა, მცირე ტერიტორიაზე, ბათუმში იყო ძალიან დიდი მობილობა, არ იცავდნენ წესებს: პირბადის ტარებას... ჩვენ რომ გაზაფხულზე გვქონოდა, ამ ტიპის აფეთქება, როგორიც გვქონდა - ოქტომბერ-ნოემბერში დეკემბერში, ქვეყნისთვის ეს ძალიან რთული იქნებოდა. ჩვენ სერიოზულად შევაკავეთ გაზაფხულზე ინფექცია, სერიოზული კვლევები გვაქვს ამაზე ჩატარებული. ეს შეიძლება აღქმული იყოს, როგორც გარკვეული ხარვეზი ჩვენი მართვის. აჭარა ავტონომიური რესპუბლიკაა... ესე ადვილი არაა, ავტონომიურ რესპუბლიკაში საგანგებო მდგომარეობის გამოცხადება. ჩვენ ნოემბერ-დეკემბერში გვქონდა ე.წ. ნამატი ჭარბი სიკვდილიანობა, ყველა ქვეყანას აქვს ეს ჭარბი სიკვდილიანობა, მათ შორის ჩვენც და ჩვენთან ძირითადად ნოემბერ-დეკემბრის ხარჯზე იყო. ასევე სექტემბრის შუა რიცხვებამდე გავრცელება სულ - 1500 ადამიანი იყო და 19 ადამიანი გვყავდა გარდაცვლილი. მერე რაც მოხდა, მიზეზები ვიცით, ერთი რომ ბათუმს ვერ მოვუარეთ თავის დროზე, მეორე - პოლიტიკური პროცესი, რომელზეც არ ვსაუბრობ ხოლმე, პოლიტიკურ ჭრილში არ ჩავდივარ. ასევე ზაფხულში ქართველებმა დავიჯერეთ, რომ ძალიან მაგრები, ყველაზე მაგრები ვართ! ალბათ, იყო ჩემი პირადი შეცდომაც, რომ მე უფრო მტკიცე პოზიცია არ დავიჭირე, ზოგიერთ საკითხთან დაკავშირებით", - განაცხადა გამყრელიძემ.
(ipn)
