Marneuli Bələdiyyə Məclisi sədrinin müavini Riçard Giganinin oğlu zorakılıq ittihamı ilə saxlanılıb.
InterPress.ge xəbər verir ki, bu barədə Hüquq müdafiəçisi Samirə Bayramova sosial şəbəkədə yazıb.
O, baş verən hadisəyə münasibət bildirərək, Marneulidə zorakılıq və cəzasızlıq hallarını tənqid edib.
Samirə Bayramova sosial şəbəkədəki paylaşımında iki həftə əvvəl həmin şəxsin həyat yoldaşına qarşı zorakılıq ittihamı ilə bağlı məsuliyyətdən yayındığını iddia edib. O, bu prosesdə atasının və onun təyin etdiyi polis əməkdaşının roluna da toxunub.
Hüquq müdafiəçisi ümid etdiyini bildirib ki, çoxsaylı zorakılıq hallarından sonra həmin şəxs nəhayət, layiq olduğu yerdə — həbsdə olacaq.
Bayramova qeyd edib ki, həmin şəxs uzun illər Marneuli meriyasında çalışıb.
Hüquq müdafiəçisi Marneuli Bələdiyyə Məclisi sədrinin müavini Riçard Giganıya da müraciət edərək, oğlunu müdafiə etmək və onun məsuliyyətdən yayınmasına kömək etmək əvəzinə, öz hərəkətləri barədə düşünməyi tövsiyə edib.
“Vəzifə və nüfuz heç kimə qanun qarşısında məsuliyyətdən yayınmaq hissi verməməlidir”, – deyə Samirə Bayramova bildirib.
O, paylaşımının sonunda Riçard Giganıya “Müalicə olunun!” deyə müraciət edib.

