სავალან მირზოევი 1986 წლის 29 აგვისტოს საქართველოში, გარდაბნის მუნიციპალიტეტის სოფელ ყარათაქლაში დაიბადა. იგი იურისტი და პოლიტიკოსია. 2016 წლიდან საქართველოს პარლამენტის წევრია და წარმოადგენს პარტიას „ქართული ოცნება – დემოკრატიული საქართველო“.
სავალან მირზოევმა ბავშვობა გარდაბნის მუნიციპალიტეტის სოფელ ყარათაქლაში გაატარა. თავდაპირველად სწავლობდა მშობლიური სოფლის სკოლაში, მეხუთე კლასიდან კი სწავლა ქალაქ რუსთავის №7 საჯარო სკოლაში გააგრძელა. აზერბაიჯანულენოვან სკოლაში სწავლის პერიოდში ქართული ენის შესწავლაც დაიწყო. მოგვიანებით უმაღლესი განათლება ქართულ ენაზე განაგრძო და იურიდიული განათლება მიიღო.
2009 წელს დაამთავრა ივანე ჯავახიშვილის სახელობის თბილისის სახელმწიფო უნივერსიტეტის ქვემო ქართლის ფილიალი სამართალმცოდნეობის სპეციალობით.
შრომითი საქმიანობა 2006 წელს გარდაბნის მუნიციპალიტეტში დაიწყო. 2006–2007 წლებში მუშაობდა კეთილმოწყობისა და კომუნალური მეურნეობის სამსახურის მთავარ სპეციალისტად. 2007–2008 წლებში კი იკავებდა გარდაბნის მუნიციპალიტეტის იურიდიულ საკითხთა სპეციალისტის, მთავარი სპეციალისტისა და აპარატის უფროსის თანამდებობებს.
2009–2013 წლებში იყო საქართველოს რეინტეგრაციის საკითხებში სახელმწიფო მინისტრის აპარატის მრჩეველი. ამასთანავე, იგი წარმოადგენდა სახელმწიფო მინისტრს ეთნიკური უმცირესობებით კომპაქტურად დასახლებულ რეგიონებში.
2013–2016 წლებში მუშაობდა საქართველოს მთავრობის ადმინისტრაციაში პრემიერ-მინისტრის თანაშემწედ. ამ პერიოდში ასევე მონაწილეობდა ეროვნულ უმცირესობებთან დაკავშირებულ საკითხებზე მუშაობაში.
2016 წელს გამართულ საპარლამენტო არჩევნებში სავალან მირზოევმა კანდიდატურა გარდაბნის მაჟორიტარულ საარჩევნო ოლქში წარადგინა და საქართველოს პარლამენტის IX მოწვევის წევრი გახდა. იგი გარდაბნის მაჟორიტარული საარჩევნო ოლქიდან არჩეული პირველი აზერბაიჯანელი დეპუტატი იყო.
2020 წლის საპარლამენტო არჩევნების შედეგად იგი X მოწვევის, ხოლო 2024 წლის საპარლამენტო არჩევნების შედეგად XI მოწვევის საქართველოს პარლამენტის წევრად აირჩიეს პარტია „ქართული ოცნება – დემოკრატიული საქართველოს“ პარტიული სიით.
ამჟამად სავალან მირზოევი საქართველოს პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარის მოადგილეა. მისი საპარლამენტო საქმიანობა მოიცავს ეთნიკური უმცირესობების უფლებების დაცვის, სამოქალაქო ინტეგრაციისა და სხვა საკანონმდებლო საკითხებზე მუშაობას.
სავალან მირზოევი 2012 წლის 26 მაისს დაქორწინდა.